Tags

, ,

20130129_163557

Investimemtu hosi Rai Liur: Oportunidade no Dezafiu ba Timor

Guteriano Neves

 

Introdusaun

Investimentu hosi rai liur – Foreign Direct Investment (FDI) – nu’udar asuntu importante ida iha kontextu dezenvolvimentu ekonomia mundiál agora. Iha nivel teorítiku, iha debate maka’as entre ekonomista sira kona ba impaktu negativu no pozitivu hosi Investimentu rai liur, no mos prezensa kompañia  multinasionál sira nu’udar ajenti ba investimentu externa, iha país ne’ebé simu investimentu. Debate sira ne’e foka barak liu kona ba impaktu hosi investimentu rai liur iha kontextu dezenvolvimentu sustentavel país ne’ebé simu investimentu externa.

Timor mos dala barak koalia no promove investimentu rai liur. Iha okaziaun barak, Timor, ita nia lider barak expreza sira nia interese atu dada investimentu mai. Fiar ne’ebé iha katak, wainhira investimentu barak mak tama iha Timor, bele ajuda hamenus dezempregu iha Timor-Leste. Maski nune’e, iha faktus barak ne’ebé prova katak dala barak mos, ida ne’e la akontese. Ida ne’e depende ba faktores determinante seluk hanesan kuadrus legais no polítika, infraestrutura, rekursu umanu, no jeografika. Ba, Timor atu sai atrativu ba investimentu hosi rai li’ur, sei presiza hadi’a buat barak. Relatorio ida ne’e subliña pontu balu ne’ebé sai hanesan pontu fraku, pontu forte, no oportunidade ne’ebé Timor iha.

Kuadrus Teoritiku

Investimentu rai li’ur, simplismente, ita bele defini nu’udar investimentu ne’ebé halo hosi kompañia ka investor ida ne’ebé orijin hosi país ida ba ba país seluk. Forma de investimentu ida ne’e halo iha forma oioin hanesan: prezensa kompañia, forma parseria ho kompañia lokal, no modelu prezensa seluk. Iha mundu ida ne’ebé globalizadu, integradu no interdependente hanesan agora, investimentu sai hanesan fator importante ida iha dezenvolvimentu ekonomia mundiál nian. Revolusaun teknolójia no informasaun mos intensifika movimentu kapital hosi país ida ba país seluk, sai fasil no baratu liu tan. Investor bele ida muda sira nia kapital hosi fatin ida ba fatin seluk ho fasil no lalais liu. E investimentu rai liur sai nu’udar komponente imprtante ida ne’ebé dudu globalizasaun ekonomia iha tempu ida agora.

Movimentu kapital hosi país ida ba país seluk aumenta hosi tempu ba tempu, hanesan estatistika barak prova. Bazeia ba relatorio hosi Organizasaun ONU nian ba Komersiu no Dezenvolvimentu – UNCTAD -, iha tinan 1970, movimentu investimentu externa iha mundu tomak hamutuk milloens $13,346. Iha 1998, total investimentu externu iha mundu tomak mak milloens $706,266; no iha 2011, total investimentu externu mundiál sa’e to’o ona millaun $1,524,422. Katak aumenta 3000% iha tinan 31 nia laran ou kuaze dupla kada tinan.

Haree ba espesifiku ba kada rejiaun, ekonomia dezenvolvidu sei hetan investimentu boot liu, tuir fali país sub-dezenvolvidu sira, no tuir país kiak sira ka – Least Developed Countries – hetan porsaun kiik liu. Haree ba kada rejiaun, Afrika mak hetan hetan investimentu kiik liu duke rejiaun sira seluk. Ida ne’e hatudu katak investidor sira sei prefere liu ba país riku no dezenvolvidu duke nasaun kiik no kiak sira. Estudu balu mos sujere katak maioria hosi movimentu investimentu externa sei konsentra iha país dezenvolvidu no riku sira. Entre país kiak sira, investimentu externa sei konsentra iha país balu deit ho merkadu boot.

Mudansa maka’as liu akontese iha país sub-dezenvolvidu sira. Iha 1970 e tal, investimentu ne’ebé tama iha país sub-dezenvolvidu sira sei milloens $3,534. Maibé iha Mas iha 1999, investimentu sa’e to’o ona millaun $11,876 no iha 2011, ida ne’e sa’e to’o 42,652. Ida ne’e implika katak movimentu externa iha país sub-dezenvolvidu sira aumenta 1100% iha period tinan 40 nia laran. Iha 1970, total investimentu externa ne’ebé tama sai país dezenvolvidu sira hamutuk millaun $114,035, no iha 2011, númeru ida ne’e aumenta ba millaun $747, 860.  Ida ne’e katak kresimentu investimentu externa hamutuk 555%. Maski nune’e, haree ba valor nominal, movimentu investimentu externa iha país dezenvolvidu sira sei ás liu bloku ekonomia sira seluk. Iha 1970, total investimentu externa iha país dezenvolvidu sira akumula 74% hosi total investimentu externa mundiál. Iha 2011, maski iha periodu resesaun nian, investimentu externa iha pais dezenvolvidu sira sei akumula 49% hosi total investimentu externa mundiál.

Dezde 2008, ho krize finansial ne’ebé ataka país sira iha Eropa, movimentu investimentu iha país dezenvolvidu sira tun; no iha tempu hanesan, movimentu investimentu externa iha país sub-dezenvolvidu sira aumenta. Maski nune’e, haree ba persentajem, movimentu investimentu externa iha país dezenvolvidu sei aas liu duke iha país sub-dezenvolvidu sira.

Iha konkordansia kona ba movimentu kapital iha tinan hira ikus ne’e, intensifika hosi revolusaun iha informasaun no teknolojia. Maibé asuntu ne’ebé sei hamosu debate maka’as mak intensaun no mos impaktu hosi investimentu hosi rai seluk iha país ne’ebé simu investimentu, liu hosi prezensa kompañia multinasionál sira.  Iha nivel akademiku, iha grupu rua ne’ebé involve iha debate kona ba asuntu investimentu externa. Grupu primeiru mak sira ne’ebé suporta investimentu externa. Em jeral sira argumenta katak investimentu hosi rai li’ur sei ajuda kria kapital foun, dudu kresimentu ekonomiku, kria kampu de servisu, ajuda transfere matenek no teknolójia ba traballador lokal, no ajuda reduz pobreza. Tanba ne’e,  grupu ne’e advoka maka’as ba Governu atu kria kondisaun ne’ebé atrativu ba investimentu rai li’ur.

Esplikasaun kona ba razaun iha leten mak tuir mai ne’e. Uluk nana’in, investimentu rai li’ur bele responde ba investment gap iha país ida nian. Espetativa ida ne’e bazeia ba realidade katak país foun no país kiak sira falta kapital atu halo investimentu. Iha tempu hanesan, ezizênsia ba investimentu iha rai laran maka’as atu lori responde ba nesesidade merkadu domestik nian. Iha situasaun hanesan ne’e, investimentu rai li’ur bele taka kuak ida ne’e, wainhira seitor privadu domestiku la iha kapasidade atu responde ba ezizênsia ekonomia rai laran nian.

Razaun segundu mak transferensia matenek no koñesementu. Iha peskiza barak ne’ebé hateten katak investimentu hosi rai li’ur bele fasilita transferensia matenek no koñesementu kona ba area oi-oin hanesan teknolójia, jestaun, vida emprezariu, nsst. Fatores ida ne’e importante bazeia ba asumsaun katak iha país foun, rekursu umanu la adekuadu, koñesementu iha area teknolójia, jestaun no emprezariu sei limitadu, no instituisaun públiku la efetivu. Tanba ne’e, prezensa investiimentu hosi rai liur ho ninia emar sira, sei ajuda atu hasa’e kapasidade iha area oi-oin no ajuda dudu efisiensia iha instituisaun públiku. Dala barak ema haree aspetu ida ne’e mak importante liu hotu duke transferensia kapital. Razaun tanba kapital bele semo ba mai, maibé matenek no koñesementu ne’ebé ema iha bele hela nafatin iha rai laran. E wainhira investor sira tama, sira mós lori mai sira nia matenek,  ne’ebé bele dudu dezenvolviimentu kapital umanu no dezenvolvimentu institusional iha país ne’ebé simu investimentu.

Aumenta produtividade nu’udar razaun seluk ne’ebé ema uza atu lori suporta prezensa investimentu externa. Katak prezensa investimentu hosi rai liur bele aumenta produtividade iha país ida nian. Ida ne’e haree liu ba investimentu iha seitor indústria – Manufacturing – ne’ebé sira halo investimentu iha país ida, no sira produz produtu ruma iha país ne’ebé sira investe ba. Produtu hirak ne’e tama iha produtu pais ne’ebe simu investimentu Ezemplu hanesan investimentu atu produz sabaun iha rai laran. Ida ne’e bele sura hanesan produsaun rai laran, tanba prosesu Value added halo iha rai laran.

Sei relata ho pontu terseiru, investimentu hosi rai liur mos bele substitui importasaun. Wainhira país ida importa sasan ruma hosi rai liur ho kuantidade ne’ebé boot, signifika katak ezizênsia iha merkadu domestik ba sasan ne’e maka’as, ka iha merkadu ba sasan refere. Entaun, investor sira haree ne’e hanesan oportunidade ida atu halo investimentu iha rai laran lori responde ba ezizênsia merkadu domestik nian. Wainhira sira produz sasan refere iha rai laran, sasan ne’e bele substitui tia sasan ne’ebé antes ne’e importadu.

Iha nasaun  foun barak, ema haree investimentu hosi rai liur hanesan alternativa tanba seior privadu rai laran seidauk iha kapasidade atu halo investimentu iha nivel boot no kria oportunidade servisu. No investimentu hosi rai liur mós bele kria ezizênsia ba kampu du servisu, no aumenta rendimentu populasaun nian. Pur ezemplu, indústria ki’ik hanesan juz. Ida ne’e sei presiza ema atu halo prosesamentu iha fabrika, ema atu halo distribuisaun, ema atu halo promosaun. E importante liu tan, wainhira indústria juz iha Timor-Leste, sei kria ezizênsia ba produtu agrikola, liliu aifuan sira no ikus mai bele aumenta rendimentuu povu sira iha area rural.

Razaun seluk mak wainhira prosesu prosesu indústria ka Value added halo iha rai laran, sei kria ezizênsia ba produtu sira ne’ebé mak presiza iha prosesu indústria. Ida ne’e sei dudu mosu atividade ekonomia iha seitor seluk hanesan seitor jasa, agrikultura, edukasaun, hospitalidade, hotelaria, no seluk tan. Pur ezemplu, se iha investor ida mak investe iha indústria aifuan, entaun sei kria ezizênsia ba seitor agrikultura tanba ema presiza fornese ai-fuan hosi to’os. No ida ne’e sei dudu kriasaun empregu iha seitor oi-oin hanesan agrikultura, edukasaun, infraéstrutura, seitor jasa, nsst. Ida ne’e mak ema hanaran spill over effect.

No ikus liu, finalidade hosi investimentu hosi rai liur mak fasilita distribuisaun riku soi, kria igualidade sosial, no ikus liu, hatun kiak. Iha fiar ida katak wainhira país ida hetan investimentu hosi país seluk, ida ne’e sei hamenus dizigualidade tanba kria kampu du servisu, fasilita distribuisaun riku soin, no hamenus kiak.

Grupu ne’ebé kontra investimestimentu rai liur, refere liu ba atividade hosi Kompañia Multinasionál sira. Grupu ida ne’e la konkorda ho argumentu katak kompañia sira nia investimentu sei bele aumenta riku soin país ne’ebé sira investe ba. Razaun tanba bele iha kolusaun entre Governu no kompañia sira. Aumenta ba ne’e, iha mos duvida kona ba klaim katak osan sira ne’ebé kompañia hetan sei investe fila fali iha rai laran. Grupu ne’ebé kontra haree katak dala barak investor sira la investe fila fali lukru ne’ebé sira hetan iha país refere, maibé sira haruka fila fali osan ne’e ba país orijin.

Maski iha rekoñesementu katak investimentu hosi kompañia rai liur sira diak atu halo balansu ba komersiu iha tempu badak, maibé ba longu prazu, iha impaktu negativu tanba sei hamenus fila fali balansua komersiu país ninian. Razaun katak kompañia sira sei importa sasan barak – bahan baku – hosi sira nia país orijin, no sira mos sei haruka fila fali  kapital barak hosi país ne’ebé sira investe ba ba país orijin. Tanba ne’e sira argumenta katak país ne’ebé hetan investimentu la hetan benefisiu ne’ebé justu.

Iha mos argumentu katak maski kompañia sira ne’e halo kontribuisaun liu hosi taxa, valor hosi kontribuisaun ne’e ki’ik. Dala barak kompañia sira ne’e hetan exempsaun hosi taxa tanba iha relasaun diak ho ema iha instituisaun governu nia laran ou hetan protesaun hosi Governu. No wainhira kompañia sira aumenta riku no boot, sira nia poder mos sai forte atu halo negosiasaun ho Governu atu la selu taxa ou husu Governu atu hatun taxa. Sira mos bele halo ameasa ba país ida nian, atu retira sira nia investimentu, no ida ne’e bele ameasa stabilidade polítika país ida nian.

Kuatru, kona ba transferensia matenek no koñesementu, kritika ne’ebé mosu katak transferensia sira matenek no koñesementu ne’e dala barak la akontese. Kritika ne’ebé iha katak dala barak Governu kria zona especial balu atu procesa sasan atu importa, no zona ne’e la iha relasaun ho area sira seluk. Ema sira ne’ebé servisu mos laiha koneksaun ho area seluk, tanba ne’e la kria Spill over effect.Situasaun sira ne’e dala barak akontese tipu investiimentu sira iha area rekursu naturais nian hanesan petroleu, LNG, Ouro, no mos diamonte.

Kritikan mos argumenta katak kompañia sira nia prezensa kria tan dizigualidade social. Produtu sira ne’ebé kompañia sira produz la’os atu responde nesesidade povu iha país ne’ebé simu halo investimentu. Realidade ne’ebé akontese mak investimentu sira ne’ebé kompañia sira ne’e halo atu lori hatan ba ezizênsia merkadu hosi país orijin nian.

Ho situasaun hanesan ne’e, iha preokupasaun katak kompañia sira nia prezensa hanesan forma kolonializmu foun ida ne’ebé mai atu halo fali exploitasaun ba rekursu naturais no traballador iha país ne’ebé sira investe ba. No preokupasaun ikus liu katak wainhira kompañia sira ne’e sai boot, sira bele influénsia fali desizaun polítika iha país ne’ebé refere. Kritika seluk kona ba prezensa investimentu externa mak impaktu ba meiu ambiente. Iha rede mundiál barak ne’ebé argumenta katak prezensa investimentu externa liu hosi kompañia sira estraga meiu ambiente, viola direitus umanus, direitus komunidade nian, no seluk tan. Kazu barak mak sira uza atu lori defende argumentu hirak ne’e, hanesan prezensa Freeport iha Papua, Chevron iha Nigeria, Chiquita iha Kolombia, nsst.

No ikus liu, iha mos duvida kona ba argumentu katak investimentu hosi rai liur bele fasilita distribuisaun riku soin, no bele hamenus kiak. Ba sira, investimentu hosi rai liur, invez de kria igualidade sosial, aumenta tan dizigualidade sosial. Investimentu ne’e so fo benefisiu ba ema oit’oan deit. Maski sira rekonhese kona ba impaktu pozitivu ba kriasaun kampu du servisu, faktus balu hatudu mos katak kampu du servisu ne’e ba ema ne’ebé iha nivel edukasaun aas no iha matenek deit. Ba sira ne’ebé mak kiak no laiha edukasaun, buat ne’ebé akontese mak exploitasaun. Ezemplu balu hosi ne’e mak prezensa kompañia Nike iha Indonezia.

Existensia investimentu externa no prezensa kompañia multinasionál hamosu debate maka’as iha nivel akademiku no mos iha nivel polítika. Maski hetan kritika barak, susar atu nega katak iha mundu ida ne’ebé globalizadu no integradu hanesan agora, investmentu externa no prezensa kompañia sira hola papel importante iha dezenvolvimentu ekonomia país ida nian. E esperiensia país sira iha Azia depois de krize dala barak hetan konsiderasaun nu’udar ezemplu pozitivu hosi prezensa investimentu externa. Differensia ideias no konkluzaun hosi kada peskiza somente hatudu hatudu deit kona ba diferente metodu de peskiza, kazu ne’ebé kada peskizador foti, no aproximasaun ne’ebé sira uza. Konkluzaun ne’ebé ita bele foti hosi debate hirak ne’e katak prezensa investimentu hosi rai liur, atu benefisiu ka lae, sei depende ba polítika nasaun id-idak nian, realidade iha país ne’ebé sai nain, no rekursu umanu, rekursu naturais, no kondisaun jeografika hosi país refere.

Atrai investimentu

Diskusaun kona ba investimentu rai li’ur iha Timor dala barak hatudu deit kona ba esperansa, no falta analiza ne’ebé klean kona ba perspetiva hosi investor sira. Pergunta importante ba Timor-Leste mak saida mak atrai investor sira atu halo investimentu ida? Ou saida mak dada investor sira atu halo investiimentu ida? Simplesmente, ema hotu konsente katak fator determinante hosi investimentu ida mak hetan maximiza retornu no lukru no hatun kustu produsaun nian.

Atu atrai investimentu hosi país seluk, importante atu kria kondisaun sira ne’ebé mak bele atrai investimentu. Hosi perspetiva kompañia ne’ebé halo investimentu nian, iha fator lubuk ida ne’ebé determinante ba sira atu halo investimentu. Pozisaun jeografika sai hanesan fator ida ne’ebé investor sira konsidera atu antes halo investimentu; prinsipalmente, ba investimentu iha seitor indústria – manufacturing – ne’ebé nia orientasaun mak atu ba exporta. Iha kontextu ne’e proximidade país ne’ebé simu investimentu no país ne’ebé sai merkadu atu fa’an produtu nu’udar xave. Proximidade jeografika ida ne’e sei determina mos kustu de transporte no nivel kompetividade iha merkadu.

Kestaun seluk mak kestaun merkadu. Iha país ne’ebé ho populasaun barak, kondisaun jeografika boot, no klase media – middle class – boot, nivel kompetividade atu hetan investimentu boot liu duke sira ne’ebé ki’ik, no ema kiak barak.  Ida ne’e importante ba investimentu ida ne’ebé nia intensaun mak atu buka no haluan merkadu. Ba indústria ki’ik sira, fatores ida ne’e importante, liliu ba kompañia ne’ebé hakarak hases’an hosi taxa importasaun. Pur ezemplu, wainhira kompañia ida hosi Indonezia hakarak loke fabrika be iha Timor, kompañia ne’e tenki iha konfiansa katak konsumidor bee iha Timor aas. Tanba ne’e, existensia klase media, no ema riku sira iha rai laran sai xave atu determina nivel kompetividade país refere. Sei relata ho asuntu refere, proximidade jeográfiku mos krítiku ba ida ne’e, liliu ba indústria ne’ebé orienta ba exportasaun.

Fator seluk mak kondisaun traballador. Ba kompañia sira halo investimentu iha area teknologia, no capital intensive, traballador ho nivel edukasaun as sei sai fator ida ne’ebé atrativu ba sira. Ba investor ne’ebé investe iha area Labour intensive, sira la dun presiza ema ho kapasidade intellectual maka’as. Maibé sira presiza ema ho servisu maka’as, ho nivel edukasaun la dun as, no sira bele selu ho baratu.  Tanba ida ne’e mak sei determina sira kustu de produsaun.

Ezistensia rekursu naturais sai fator seluk ne’ebé atrai investor sira hosi rai li’ur. Mina, osan mean, dala barak atrai kompañia boot sira ho kapital maka’as. Maibé dala barak ida ne’e la kria kampu du servisu barak. Pelu kontrariu, produtu agrikultura sira hanesan aifuan, haree, kafee, mos atrai investor sira iha iha area indústria ki’ik no medium. Ida ne’e bele kria kampu du servisu barak, no nia prosesu spill over lalais liu.

Kondisaun infraéstrutura fiziku mos determinante atu atrai investor sira hosi rai li’ur. Kondisaun Estrada, telekomunikasaun, transporte, eletrisidade, esensial tanba ida ne’e mak determina ninia kustu de produsaun, no nivel kompetividade produtu nian iha merkadu regional no internasionál. Wainhira kustu de produsaun as, sei implika ba sasan nia folin as, no nia impaktu mak nivel kompetividade iha merkadu internasionál sei tuun.

Ikus liu mak kestaun infraéstrutura institusional, ho ninia polítika – kebijakan – sira. Nivel kompetividade país ida nian mos depende ba oinsa instituisaun ne’ebé existe no ninia kuadrus polítika ne’ebé iha.

Haree hosi pontu de vista investor nian, país ho ninia instituisaun no polítika atu fasilita investimentu sei atrativu liu duke país ne’ebé laiha. Polítika hirak ne’e mak polítika tributaria nian ne’ebé favoravel ba exportasaun no importasaun, lei ba protesaun meiu ambiente no protesaun traballador, polítika fiskal no polítika monetariu ne’ebé promove investimentu externa, no fasilita exportasaun no importasaun, no polítika tributaria.

Polítika Ekonomia Timor nian no Investimentu Externa iha Timor

Estrutura ekonomia Timor nian agora dadaun sei domina hosi seitor públiku. Gastus seitor públiku kontribui kuaze 40% ba GDP Timor nian total. Hanesan deskreve iha Livru 1, Orsamentu Annual 2012, maski iha iha rekoñesementu kona ba expansaun seitor privadu; expansaun ida ne’e mosu tanba gastus seitor públiku ne’ebée maka’as, liliu iha seitor konstrusaun fíziku. Iha mos argumentu katak atividade ekonomia iha seitor non-públiku akontese tanba gastus seitor públiku ne’ebe mak aas. Osan ne’e mak sirkula fila fali iha merkadu. Iha termus de empregu, seitor agrikultor sei emprega maioria Timor oan. Seitor públiku emprega mais de 40,000 Timor oan. Tuir Survey kona ba Atividade Emprezariu iha 2010, ne’ebé hala’o hosi Diresaun Nasionál de Estatístika, ema hamutuk 46,700 mak emprega hosi seitor privadu; maioria hosi ne’e servisu iha area Loja no fa’an sasan. Ida ne’e nu’udar situasaun natural iha país ne’ebé foin hetan independensia. Maibé iha tempu hanesan, investimentu ne’ebé Timor halo mos tenki iha area estratéjiku sira, atu bele hamenus dependensia ba seitor públiku ne’ebé maka’as. Situasaun ida ne’e presiza hetan konsiderasaun aas liu tan tanba gastus seitor públiku mai hosi seitor petroleu; ne’ebe labele renova.

Konstituisaun Timor-Leste nian, artigu 138 hateten katak ekonomia Timor-Leste nian tenki bazeia ba inisiativa hosi komunidade, existesia seitor públiku, seitor privadu kooperativa. Relata direitamentu ho investimentu, artigu 140 hateten katak estadu tenki promove investimentu no kria kondisaun atu atrai investimentu externa, tau konsiderasaun ba interese nasionál, no tenki bazeia ba lei. Lei espesifiku kona ba investimentu externa mak Lei Nu.05/2005, kona ba Investimentu Externa. Lei ne’e rekoñese importansia hosi investimentu externa atu dezenvolve ekonomia Timor lori kontribui ba redusaun dezempregu, aumenta koñesementu Timor oan, dezenvolvimentu indústria no aumenta produtividade, rehabilita infraéstrutura ekonomia no dezenvolvimentu umanu Timor nian.  Tanba ne’e, lei refere fó protesaun no previlejiu barak ba investor hosi rai liur ne’ebé hakarak halo investimentu iha Timor. Previlejiu hirak ne’e mak direitu atu halo transferensia hosi retornu investimentu nian, flexibilidade atu emprega traballador hosi rai liur, tax credit, custom incentives, no exemption for rent payment ba uma estadu nian.

Prinsipiu balu hosi PEDN mos fo importansia ba komersiu livre no atrai investimentu externa, iha area petroleu, turizmu, peskas, finansas, telekomunikasaun no seitor seluk. Iha dokumentu ne’e  mos esplika kona ba relasaun ekonomiku forte ho membru ASEAN sira, membru CPLPL no país sub-dezenvolvidu seluk. Maibé, PEDN realistiku lori rekonhese katak to’o 2020, investimentu públiku sei sai nafatin xavi atu kria kondisaun ba ekonomia sustentavel.

Maski iha liña polítika ne’ebé konsidera hanesan liberal, to’o agora, obviamente, prezensa investimentu externa ho kuantidade ne’ebé boot iha Timor sei ki’ik. Investimentu boot ne’ebé ita haree mak Timor Telecom, Bank Mandiri, Hotel sira hanesan Hotel Timor, Hotel Ramelau, Turizmu, no investimentu iha seitor servisu – jasa – ki’ik seluk. Prezensa kompañia foun rua iha area telekomunikasaun; Viettel Global Investment hosi Vietnam no Telin hosi Indonezia; hanesan forma investmentu externa ne’ebé agora ita haree hetan. Iha seitor jasa nian, maski iha kompañia balu ne’ebé fornese servisu iha area oioin, prezensa investimentu externa seidauk maka’as. Nune’e mos iha seitor indústria, prezensa investimentu boot kuaze ita haree la hetan. Iha seitor bankaria, iha prezensa banku boot tolu; BNU, Mandiri no ANZ. Iha seitor Wholesale ka fa’an sasan barak tebes, hanesan toko sira hanesan Lita Store, Jacinto, Leader, Patteo, Timor Plaza, no toko ki’ik sira seluk. Nia impaktu ba nivel kresimentu ekonomia no kresimentu empregu mos sei k’ik, hanesan prova hosi Survey kona ba Atividade Emprezariu.

Polítika seluk ne’ebé Timor presiza haree fila fali mos polítika tributaria Timor nian agora. Agora dadaun, Timor nia polítika tributaria la atrativu atu ema halo investimentu iha rai laran. Polítika Tributaria ida ne’e insentiva ema atu importa sasan hotu hosi rai liur duke atu investe no hahuu indústria iha rai laran. Ida ne’e fator ida ne’ebé la favorese ba Timor atu hetan investimentu.

Area Investimentu ne’ebé Timor Presiza Konsidera

Maski agora dadaun, susar atu espera katak investimentu externa atu substitui investimentu públiku, ba tempu naruk, Timor klaru presiza investimentu externa. Oinsa atu maximiza ninia benefisiu ba Timor-Leste sei depende ba kuadrus polítika ne’ebé mak Timor trasa. Em jeral, haree hosi pontu de vista investor sira nian, haree ba kuadrus polítika, kuadrus instituisaun, kustu, kuadrus polítika fiskais, no infraéstrutura fiziku ne’ebé agora existe, Timor sei dook liu atu bele kompete ho país seluk iha rejiaun atu hetan investimentu hosi país seluk. Maski nune’e, iha indikasaun balu ne’ebé bele lori ita atu iha esperansa.  Prezensa kompañia sira hanesan Timor-Telecom, Telkomsel, Vettel, no kompañia konstrusaun sira iha Timor hatudu indikasaun katak iha konfiansa balu ba iha investimentu iha Timor.

Haree ba tipu de investimentu externa ne’ebé iha, ba Timor, importante ba Timor nia kondisaun mak atu atrai investimentu iha seitor sira ne’ebé mak bele akumula kampu du traballu barak. Haree ba produtu espesifiku, Timor bele konsentra iha produtu sira ne’ebé bele substitui sasan importasaun sira. Entaun investimentu ho tipu Emprezariu ki’ik no mediu importante, iha area indústria ai-han hanesan, juz, be mos, hahan kaleng sira, no nesesidade baziku sai importante. Ajensia sira hanesan PNUD no Banku Mundial mos promove investimentu iha area hirak iha leten ho nivel mikro-indústria.

Indústria ai-han sira, la presiza kapital boot no ninia merkadu mos boot iha Timor-Leste, tanba kuaze ema hotu bele hola. Kada tinan, Timor gasta milloens lubuk ida lori hola na’an, manu tolun, susu ben, hosi rai liur. Ida ne’e implika katak merkadu ba sasan ne’e iha. Aumenta ba ne’e, ho nivel gastus Governu nian boot, bele aumenta klase media iha Timor. Wainhira ema nia kualidade moris aumenta liu hosi rendimentu, ezizênsia ba hahan ho kualidade diak sei aumenta. Tanba ne’e, iha esperansa maka’as katak merkadu ba indústria ai-han sei aumenta. Buat ne’ebé presiza hadi’a mak promosaun ba investimentu, no desizaun atu promove investimentu externa iha area ne’ebé.

Haree ba ita nia balansu komersiu Timor nian, kada tinan, ita haruka osan millaun barak ba Indonezia no Singapora lori hola ai-han sira ne’ebé tuir lolos ita rasik bele produz iha rai laran. Investimentu iha area indústria ai-han mos importante atu transforma agrikultura hosi agrikultura subsistensia ba agrikultura ne’ebé orienta ba merkadu. Tanba, wainhira mosu indústria ai-han, ezizênsia ba produtu agrikultura sei aumenta. Ida ne’e bele dudu kresimentu produsaun iha area agrikultura. Ne’e bele kria spill over effect maka’as ba iha ekonomia Timor nian, no bele ajuda reduz pobreza. Ida ne’e nu’udar opsaun estratéjiku tebes ba Timor. Maioria populasaun moris iha agrikultura, no sira nia kontribuisaun ba rendimentu estadu ki’ik. Tanba ne’e, atu reduz pobreza iha Timor, dalan ida mak tenki transforma seitor agrikultura atu sai seitor ida ne’ebe produtivu, no atrativu.

Seitor Servisu – service/jasa, nu’udar seitor estratejiku seluk ne’ebe mos iha ninia prospeitu iha Timor-Leste. Bazeia ba Relatorio Annual hosi Banku Sentral nian, iha tinan 2011, Timor-Leste importa seitor ida ne’e niain hamutuk $1.4 billoens. Instituisaun Governu nu’udar konsumidor aas liu iha seitor ne’e. Ida ne’e indika katak iha merkadu ba tipu ida ne’e.

Area seluk ne’ebé bele konsidera mak hospitalidade no Turizmu. Timor, tuir ema barak nia haree, iha natureza ne’ebé furak, ninia kultura no istoria ne’ebé uniku; nune’e mos ninia emar sira. Aumenta ba ne’e, Timor hanesan Melting Spot entre Azia ho Pasifiku. Ida ne’e sai nu’udar vantajem komparativu – “Comparative advantage” -ida atu dada investor sira iha area ospitalidade no otelaria. Aumenta ba ida ne’e, prezensa Turista barak iha Bali, bele sai pontu pozitivu ida ba Timor tanba Bali besik ho Timor.  Aumenta ba ne’e, estatistika hatudu katak ema ne’ebé mai Timor ho vistu Turista mos aumenta hosi tinan ba tinan. Sinal pozitivu sira ne’e bele sai hanesan pontu forte ba Timor atu atrai investimentu iha seitor ida ne’e.

Kona ba rekursu naturais, rekursu naturais ne’ebé durante ne’e Timor fiar maka’as mak seitor petroleum. Laiha ema ida mak duvida kona ba interese hosi kompañia internasionál iha seitor ne’e. Dezenvolvimentu seitor ida ne’e sai sentru atu atinzi Planu Estratejiku Dezenvolvimentu Nasionál. Maibé, to’o agora, kampo ne’ebé ita hatene mak Greater Sunrise deit. Seidauk iha certeza ruma kona ba kampu seluk ne’ebé ninia viabilidade maka’as iha merkadu internasionál. Maski Timor-Leste bele deskobre tan kampu seluk iha futuru oin mai, seitor ida ne’e bele sai makina ba dezenvolvimentu seitor seluk.

Analiza ba Forsa, Frakeza no Oportunidade Timor nian ba investimentu

Atu komprende kona ba asuntu ne’e, importante ba ita atu komprende kona ba pontu forte, pontu fraku ne’ebé Timor iha atu hetan investimentu. Importante ba Timor mak atu komprende kontextu ida ne’e, no bazeia ba ne’e, ita bele trasa planu ida.

Pontu forte ne’ebé Timor iha mak, Timor nia kondisaun jeografika ne’ebé. Ho besik país boot rua, Indonesia no Australia, Timor nia pozisaun jeografika ida ne’e fo vantajem ba nia. Katak Timor nia proximidade ho país rua ne’e bele fo vantajem ba ita atu asesu ba sira nia merkadu ne’ebé boot. Importante ba Timor mak oinsa atu halo estudu ida kona ba produtu saida mak merkadu rua ne’e presiza, no saida mak sai vantajem komparativu ba Timor.

Pontu forte seluk ne’ebé Timor iha mak ninia ekonomia durante tinan lima nia laran. Maski iha kritika barak, Timor nia nivel dezenvolvimentu ekonomia ne’ebé agora la’o, hetan apresiasaun barak. Ho faktus katak Timor nia rekursu naturais sei bele sustenta Timor maiz ou menus ba tinan 40 oin mai – se ita sura ho Greater Sunrise – ida ne’e bele fo konfiansa ba investor sira hosi rai li’ur atu ba ekonomia Timor nian. Ho projeksaun ba polítika fiskal expansionary nian, signifika katak ezizênsia ba sasan oi-oin sei aumenta, inklui ai-han, no sasan sira ba konstrusaun nian. Tanba ne’e, ida ne’e mos bele sai pontu forte ba Timor atu atrai investimentu iha area sira hanesan ne’e.

Pontu forte seluk mak Planu Estratejiku Dezenvolvimentu Timor nian. Maski planu ida ne’e ema barak haree hanesan mehi, planu ida ne’e sai hanesan mata dalan ida ba dezenvolvimentu ekonomia Timor nian.  Planu ida ne’e mos fo importansia maka’as ba kriasaun kondisaun ba dezenvolvimentu seitor privadu iha rai laran, inklui kondisaun ba investimentu externa. Haree hosi pontu de vista makro nian, planu ida ne’e mos fo sustentabilidade ba investor sira atu investe iha Timor.

Pontu forte ida seluk mak estabilidade polítika depois de krize 2006 nian. Timor, maski mosu krize polítika iha 2006, relativamente nu’udar país ne’ebé estavel, se ita kompara ho país postu konflitu seluk. Kestaun estabilidade polítika sempre sai nu’udar kestaun importante ba investor sira hosi rai li’ur. Ba sira, estabilidade rai laran sai hanesan kondisaun xave atu investe.  Ida ne’e bele kria konfiansa hosi investor sira ba Timor-Leste.

Pontu forte seluk ne’ebé Timor iha mak ninia estrutura demografika. Kuaze 50% hosi populasaun Timor mak iha idade produtivu. Ida ne’e bele sai nu’udar rekursu importante ba Timor wainhira, ita investe ba sira. Ida ne’e implika katak iha forsa traballador iha rai laran ne’ebé bele sai hanesan vantajem komparativu ida ba Timor atu atrai investor sira.

Ponte forte ikus liu mak realidade agora katak ita iha Ázia no Pasifik, no entre Indonezia no Australia. Ho mundu ne’ebé avansadu no integradu, no revolusaun teknolojia informasaun, Timor bele aprende no foti benesfisiu hosi dezenvolvimentu país rua ne’e. Iha tinan hirak nia laran, país rua ne’e nia kresimentu ekonomia maka’as. Iha tempu hanesan, iha nivel diplomátiku, offisiais hosi país rua ne’e mos espresa ona sira nia interese no komitmentu atu lakoii haree Timor sai ki’ak iha sira nia leet. Kestaun ba Timor mak oinsa atu hanoin ho estratéjiku no matenek atu dada spill over effect hosi dezenvolvimentu país rua ne’e nian,iha area sira hanesan edukasaun, teknolojia, ekonomia, nsst. Ho faktus katak Timor hetan independensia iha tempu ida ne’ebé país barak hetan ona independensia, no koko ona modelu dezenvolvimentu oioin, Timor tenki aprende hosi esperiénsia país sira iha mundu; sira ne’ebé susesu no mos sira ne’ebé falla.

Pontu fraku Timor iha mak lubuk ida. Kestaun lei no orderm sai hanesan asuntu importante ne’ebé presiza hetan konsiderasaun urjenti. Ba investor ne’ebé deit, sira presiza iha seguransa katak sira nia investimentu sei protejidu ho lei, no sira presiza konsidera katak wainhira sira asina kontratu, sira nia kontratu sei iha forsa legal. Dezafiu ne’ebé Timor enfrenta mak iha impresaun públiku katak iha Timor, lei la proteje ema nia direitu. Sentimentu ida ne’e mos maka’as iha kontraktor Timor oan sira. Ida ne’e hanesan parte fraku boot ida tanba investor sira tenki iha fiar katak wainhira sira halo kontratu ho parte ruma, kontratu ne’e tenki haforsa iha Tribunal.

Kestaun infraéstrutura nu’udar kestaun ida ne’ebé dala barak sita nu’udar frakeza boot ida hosi Timor nian. Agora dadaun, infraéstrutura Timor nian, hanesan estrada, iha area rural sei fraku tebes. Ida ne’e  implika ba kustu produsaun. Hosi dada lia ho matenek na’in balu iha area refere no mos kompañia balu iha Timor, sira mos levante kestaun ne’ebé hanesan kona ba situasaun infraéstrutura. Iha area infraestrutura, telekonomunikasaun sei sai hanesan asuntu importante. Hanesan ema barak konsente, presu ba liña telephone no internet karun tebes iha Timor.

Terseiru mak frajilidade hosi ita nia instituisaun no sistema polítika. Timor, maski halo ona eleisaun ho susesu, no prosesu transferensia de poder relativamene lao ho susesu, notisias internasionál barak sei karakteriza Timor-Leste nu’udar país ne’ebé nia instituisaun frajil. Ida ne’e sai nu’udar parte fraku Timor nian atu hetan investimentu ne’ebé boot. Frakeja iha instituisaun ida ne’e mos implika ba prosesu rejistrasaun ne’ebé han tempu barak no komplikadu. Tuir relatorio “Doing Business Report,” Timor-Leste iha pozisaun 170 kona ba oinsa atu hala’o negosiu. Signifika katak iha país 169 mak di’ak liu Timor-Leste em termus de halo negósiu. Ida ne’e tamba prosesu administraivu ne’ebé susar atu hahú negosiu, han tempu barak liu, no kustu boot liu, kompara ho país 169 sira seluk.

Kuartu mak merkadu ne’ebé ki’ik. Timor nia populasaun ki’ik ho populasaun mais ou menus tokon 1.1. No relatorio barak fo sai katak kuaze 50% hosi populasaun Timor sei moris iha linha pobreza nia okos. Ne’e indika katak laiha merkadu signifikante iha Timor. Entaun ba investor ne’ebé buka merkadu, no investor iha seitor jasa nian, Timor la fornese merkadu ne’ebé signifikante. Ida ne’e hanesan pontu fraku ida tan hosi Timor wainhira atu atrai investimentu rai liur.

Kestaun seluk mak sistema bankaria iha Timor. Limitasaun asesu ba kreditu, tuir Banku Dezenvolvimentu Aziatiku, nu’udar fator importante ne’ebe limita dezenvolviimentu seitor privadu iha Timor. Ida ne’e tanba Banku iha Timor la iha konfidensia atu fo kreditu ba sidadaun iha Timor, no mos tanba lei la forte atu proteze interese kreditor sira nian. Kestaun sira ne’e mak dala barak sita nu’udar problema ba investimentu hosi rai liur no reduz Timor nia nivel kompetividade.

Maski nune’e, iha oportunidade lubuk ida ne’ebé Timor bele esplora ho di’ak liu tan atu bele hetan investimentu externa. Oportunidade diak ida mak pozisaun jeografika Timor-Leste nian agora. Ho nia proximidade ho Australia no Indonezia, Timor bele esplora oinsa atu hetan investimentu hosi país rua ne’e. Timor mos bele sai fatin ba investimentu sira ne’ebé mak buka merkadu, tanba wainhira produz iha Timor, bele exporta ba país hanesan Australia, Nova Zelandia, Indonezia, no país membru ASEAN sira seluk. Kestaun ne’ebé Timor tenki hanoin mak kompetividade Timor kompara ho país sira seluk iha rejiaun ne’e. Iha kontextu ida ne’e, pozisaun Indonezia sai xave tanba Timor tenki haree ba ninia kompetividade ho Indonezia.

Aumenta ba ne’e, ho ninia pozisaun iha Azia, oportunidade seluk ne’ebé Timor iha mak faktus jeografika katak nia iha Azia.  Rejiaun ida ne’e agora daaun hetan konsiderasaun nu’udar rejiaun mais dinamiku em termus de ekonomia iha mundu iha sekulu ida ne’e. White Paper Australia nian ho titulu “Asia Century” konsidera sekulu 21 nu’udar sekulu Azia nian. Iha projeksaun katak iha tinan limanulu oin mai, klase media iha rejiaun ne’e sei aumenta maka’as, pobreza sei tuun, produsaun sei konsentra iha rejiaun ne’e. Dezenvolvimentu ekonomia iha país boot hanesan Indonezia, Xina, India, sai hanesan baze atu projekta ekonomia rejiaun ne’e nia future.  Tanba ne’e ezizênsia ba sasan iha merkadu rejional mos sei aumenta ho maka’as. Ho ida ne’e, buat ne’ebé Timor bele esplora mak oinsa atu hetan spill over effect hosi dezenvolviimentu ekonomia país sira hanesan Indonezia, Singapore, no membru ASEAN sira seluk.

Terseiru mak dinamiku iha rejiaun nia laran rasik, haree espesifiku kona ba FDI ne’ebé tama no sai iha país Sudeste Azia nia laran. Dezde krize finanseiru global hosi 2008, movimentu investimentu externa iha país sub-dezenvolvidu sira sa’e, kompara ho país dezenvolvidu sira ne’ebé tun fali. Entre país sub-dezenvolvidu sira, movimentu investimentu iha Azia maka’as liu kompara ho Afrika no Amerika Latina.

Haree espesifiku ba movimentu investimentu iha ASEAN laran rasik, movimentu investimentu iha ASEAN sei ki’ik liu kompara ho Xina. Maski Uniaun Eropeia sei sai nafatin fontes ba investimentu iha rejiaun ne’e, movimentu investimentu hosi país ba país iha ASEAN laran mos kontinua sa’e. Ida ne’e indikasaun diak ba integrasaun iha rejiaun ne’e, no Timor bele esplora oinsa atu hetan investimentu hosi país sira hanesan Singapore, Malazia, no Indonezia.

Oportunidade seluk ne’ebé Timor bele esplora mak investimentu hosi Australia. Australia. Australia nu’udar país riku ho merkadu boot. Agora dadaun, Australia ni investimentu ba rai li’ur aumenta, no 4% hosi ninia investimentu externa mai ASEAN. Importante ba Timor mak oinsa atu esplora oportunidade ne’ebé iha, liliu evolusaun ekonomia iha Australia no Azia, atu maximiza benefisiu ba Timor-Leste.

Pontu de Konsiderasoens

Pontu importante primeiru ne’ebé Timor-Leste presiza konsidera mak investimentu externa la’os solusaun ikus liu ba problema ne’ebé Timor enfrenta agora dadaun. E investimentu externa, haree hosi esperiénsia país sira seluk, la’os sempre fator pozitivu ba dezenvolvimentu país ida nian. Investimentu externa mos bele iha impaktu pozitivu ba ekonomia rai laran wainhira iha kuadrus polítika ne’ebé favoravel ba povu iha país ne’ebé simu investimentu, nivel edukasaun sidadaun sira, forsa traballador, merkadu iha rai laran, integrasaun nasionál no partisipasaun ativu hosi sidadaun sira. Wainhira laiha kuadrus polítika no legal ne’ebé favoravel, investimentu externa bele hamosu dizigualidade sosial, kria grupu elite ki’ik, hamosu enclave ki’ik, viola direitu komunidade, estraga meiu ambiente, no seluk tan.

Segundu, investimentu ba ema, liliu iha edukasaun no saúde. Timor-Leste, atu atria investor sira hosi rai li’ur, tenki iha forsa traballador ne’ebé forte, iha étika servisu ne’ebé di’ak, iha kapasidade tékniku, inovativu, no produtivu. No atu hetan ne’e, presiza investimentu boot iha edukasaun. Falla atu prepara labarik sira, sei kria responsabilidade boot iha future tanba sei hamosu jovem ne’ebé pasivu, la produtivu, violent, no sei sai ameasa ba stabilidade país ida ne’e nian.

Terseiru, haforsa lei no ordem sai hanesan pontu konsiderasoens importante. Investor sira presiza iha konfiansa ba ita nia sistema judisiariu. Sira tenki iha konfiansa katak wainhira sira asina kontratu ho Governu, sira nia kontratu sei iha forsa legal wainhira lori ba Tribunál. Situasaun ne’ebé hanesan aplika wainhira sira iha kontratu ho rai na’in, ou traballador balu.

Kuartu, infraestrutura báziku krítiku ba Timor atu atria investor sira hosi rai li’ur. Infraestrutura Timor nian sei sai fator ida ne’ebé limita ajenti ekonomia sira atu halo ativididade ekonomia. Estrada ne’ebé nakonu ho ku’ak, kustu telekomunikasaun ne’ebé karu tebes, sei afekta kustu de produsaun no nivel kompetividade.

Kintu, instituisaun púbilku tenki hasa’e efisiensia no efikásia servisu nian. Investor sira sei iha interese wainhira prosesu tomak la’o ho lalais no fasil, e la involve kustu extra hosi buat ne’ebé define ona iha lei.  Agora dadaun, relatório barak ona prova katak ita nia instituisaun púbilu sira ne’ebé tuir lolos atu fasilita investimentu iha rai laran la dun efisiente no la efikasia atu hala’o sira nia servisu. Prosesu han tempu barak liu no kustu barak liu. Ida ne’e disisentiva investor sira atu investe iha Timor.

Sextu, Timor presiza hanoin ho estratéjiku oinsa atu hetan benefisiu hosi dezenvolvimentu ekonomia Ázia nian no Australia nian. Ida ne’e sei depende ba kapasidade Timor nian atu hola desizaun estratéjiku sira. Ho pozisaun nu’udar país frajil no kiak, Timor mos iha asesu ba merkadu sira iha Australia, EU, no bloku ekonomia sira seluk. Ida ne’e bele sai hanesan fator ida ne’ebé bele dada investor sira mai Timor-Leste.

Setimu, haree ba area de investimentu, agrikultura no indústria ki’ik sira nu’udar area ne’ebé iha potensia boot. Agrikultura tanba ida ne’e relata direitamente ho maioria povu Timor nia moris. Indústria ki’ik sira iha ai-han nian iha pontesia boot tanba agora dadaun, Timor importa ai-han barak hosi rai li’ur; signifika katak iha merkadu boot iha Timor. Ida ne’e bele kontribui ba redusaun pobreza iha Timor.

Ikus liu, dalan atu atrai investimentu externa mak liu hosi estratejia promosaun investimentu. Agora dadaun, estratejia ida ne’e seidauk di’ak. Maski iha nivel altu, Timor koalia barak ona atu dada investor sira, maibé iha práktika, seidauk iha planu no vizaun no ida ne’ebé klaru atu sai mata dalan ba investor sira. Ho realidade katak informasaun ne’ebé iha mos limitadu, susar ba investor sira atu hetan informasaun. Tanba ne’e, haforsa instituisaun atu promove investimentu, prepara mata-dalan, estratejia, no vizaun ida ne’ebé klaru sei eleva konfiansa hosi investor sira mai instituisaun públiku iha Timor.

Konkluzaun

Investimentu externa nu’udar fontes importante ba kresimentu ekonomia iha era globalizadu no integradu hanesan agora. Timor, nu’udar país foun, iha esperansa katak sei hetan investimentu hosi país seluk. Ho Azia nu’udar rejiaun kresimentu ekonomia maka’as, Timor iha oportunidade atu atrai investimentu hosi rejiaun ne’e, liliu hosi país membru ASEAN. Atu hetan ne’e, Timor presiza hadi’a ninia infraéstrutura fiziku, haforsa ninia instituisaun públiku, no investe maka’as ba ninia rekursu umanu, atu bele kaptura oportunidade sira ne’ebé iha.

Kerek Na’in Nu’udar Peskizador iha Sentru Analiza, Peskiza no Dokumentasaun Palasiu Prezidênti RDTL nian.

This article has been published in the daily newspaper ‘Independente’.

Advertisements