Unemployment

Dezempregu iha Timor no Dezafiu ba futuru

 Guteriano Neves

 Asessor ba Peskiza, Analiza no Dokumentasaun

Introdusaun

Problema dezempregu nu’udar problema boot ida ne’ebé sosiedade Timor agora enfrenta. Iha diskusaun barak kona ba polítika públiku (kebijakan publik) ne’ebé ema foka kona ba asuntu dezempregu nu’udar kestaun importante ne’ebé presiza hetan atensaun. Ida ne’e obviamente katak asuntu ida ne’e presiza hetan ema barak nia konsiderasaun, tanba dezempregu sei afekta fatores barak, hanesan: kualidade moris, ekuidade iha sosiedade laran, inklusaun iha dezenvolvimentu ekonomia, no ikus liu, no konflitu horizontal iha sosiedade laran.

Dezempregu iha Timor-Leste la’os asuntu ida ne’ebé susar atu hatene. Wainhira ita la’o iha luron de’it, ita bele nota ona kona ba nivel dezempregu iha Timor-Leste. Tanba ida ne’e, la’os buat foun. Organizasaun nasionál sira hanesan La’o Hamutuk no Fundasaun Mahein, organizasaun internasionál sira hanesan ONU,  Media Internasionál, no ONG internasonál hanesan International Crisis Group fo hanoin ona mai ita kona ba perigozu hosi dezempregu ba stabilidade iha rai laran. Em jeral, parte barak konsente katak asuntu dezempregu sei sai hanesan dezafiu boot ba stabilidade rai laran iha futuru.

Artigu ida ne’e hakerek atu lori informa S.E. Prezidênti da Republika, no mos Prezidênsia tomak kona ba lala’ok dezempregu, estrutura empregu ne’ebé iha, no mos halo projeksaun ba futuru kona ba ita situasaun rai laran.

Kuadramentu Konseptual

Koalia kona ba dezempregu, pergunta primeiru ne’ebé ema husu mak saida mak dezempregu? Kestaun definisaun sai importante tanba definisaun saida deit mak ita involve, sei afekta kuantifikasaun dezempregu iha Timor-Leste. Iha kontextu ekonómiku, dezempregu nu’udar ema ne’ebé idade produtivu – tinan 15 to’o 64 – maibé la servisu. Tuir McConnel no Brue (sita hosi Bin Obaid; 1997; 152) dezempregu simplismente bele esplika nu’udar ema ho idade 15 ba leten, la servisu, maibé sira ativamente buka servisu. Tuir Organizasaun Traballador Internasionál – International Labor Organization – ILO, Dezempregu katak, ema ne’ebé iha semana kotuk, nunka servisu, ka servisu durante loron sanulu resin lima, servisu maibé la hetan pagamentu, no ativamente buka hela servisu.

Iha kategorizasaun oioin ba dezempregu. Karakterizasaun balu bazeia ba razaun ema la servisu. Ida ne’e inklui dezempregu voluntaria, dezempregu involuntaria. Primeiru mak dezempregu natural. Kategoria ida ne’e refere ba Rate ne’ebé rezulta hosi ekilibriu operasaun mikro ekonomia nian; wainhira kondisaun makroekonomia la hamosu ezizênsia exesiva hosi fornesementu (Supply) traballador (Parker; 2010; 6). Katak, maski iha situasaun makroekonomia ne’ebé ekilibriu, iha dezempregu nafatin; ne’e mak dezempregu natural. Iha dezempregu Natural nia okos, ekonomista sira sei fahe dezempregu natural ba rua: dezempregu estrutural no dezempregu friksional. Dezempregu estrutural mosu wainhira teknolojia foun ne’ebé foin introduz troka ema nia skill, tanba ne’e mak skill ne’ebé iha la apar ka fit ho vaga servisu ne’ebé iha. Dezempregu Friksional rezulta hosi hosi prosesu atu apar servisu. Pur ezemplu, jovem ida ho skill ka matenek iha area konstrusaun, maibé nia seidauk hetan servisu iha area ne’e. Maski nia hetan servisu iha fatin seluk, nia rejeita tanba la tuir nia matenek. Kategorizasaun seluk mak dezempregu syklikal, ne’ebé mosu nu’udar impaktu hosi situasaun mikro ekonomia, iha ne’ebé ezizênsia ba traballador hosi emprezariu sira tun. Ho liafuan badak, dezempregu natural mosu nu’udar rezultadu hosi ekilibriu iha makro ekonomia país ida nian; no dezempregu syklikal mosu rezulta hosi kondisaun mikro ekonomia país ida nian.

Dezempregu iha implikasaun oioin ba dezenvolvimentu ekonomia, no stabilidade país ida nian. Iha kontextu dezenvolvimentu ekonomia, wainhira maioria hosi populasaun dezempregu, signifika katak produtividade país ne’e ki’ik, laiha equidade iha dezenvolvimentu, no dezenvolvimentu la inklusivu. Situasaun ida ne’e sai perigozu liu tan iha sosiedade hanesan Timor-Leste; sosiedade ne’ebé liu hosi istoria naruk violensia nian. Referensia hosi país sira seluk prova katak dezempregu dala barak sai hanesan fator ne’ebé hamosu frustrasaun no kria kria instabilidade iha rai laran.  Tanba ne’e, tuir organizasaun oioin, falla atu atinzi dezenvolvimentu ekonómiku ne’ebé mak inklusivu no justu, dala barak kria konflitu horizontal iha sosiedade laran, no mos krime públiku. Organizasaun Traballador Internasionál (2009; 9) fo hanoin katak dezafiu boot ba país ne’ebé foin sai hosi konflitu ka postu-konflitu mak atu kria empregu ba juventudi sira, tanba dala barak juventude sira mak tama iha siklu violensia, la hatene le no hakerek no esklui hosi sosiedade laran.

Dezempregu mos iha relasaun ho kresimentu ekonómiku, dezenvolvimentu nasionál no prosesu hari nasaun iha país postu-konflitu. Prosesu dezenvolvimentu nu’udar prosesu importante ida hosi prosesu harí nasaun. Wawinhira dezenvolvimentu benefisiu ema hotu, nasaun sei sai forte, tanba ema sente katak sira parte hosi nasaun ne’e. Maibé wainhiar dezenvolvimentu ekslui tia grupu balu iha sosiedade laran, ne’e sei sai nu’udar counter productive ba iha prosesu harí nasaun, tanba psikolójikamente, ema balu sai exklui hosi prosesu dezenvolvimentu. Hosi ne’e bele mosu frustrasaun ba fábrika sosiedade nian.

Empregu iha Timor-Leste

Molok atu komprende situasaun dezempregu iha Timor, importante uluk mak atu komprende empregu iha Timor-Leste. Em jeral, hanesan país postu-konflitu sira seluk, Timor enfrenta situasaun ne’ebé país sira seluk mos enfrenta. Problema sira ne’e hanesan númeru kresimentu populasaun ne’ebé as, porsaun populasaun ho idade produtivu boot, agrikultura ne’ebé subsistensia no dizligadu ho sistema ekonomia formal ka merkadu, produsaun agrikultura ki’ik, no baze ba seitor privadu kuaze la eziste. Situasaun sira ne’e kontribui ba karaktéristiku empregu iha Timor-Leste iha tempu agora nian. Empregu iha Timor-Leste bele fahe ba kategoria hirak tuir mai ne’e: auto-empregu, seitor privadu, seitor públiku, no ONG nasionál, internasionál, no ajensia sira.

Primeiru mak auto-empregu. ILO defini auto-emprego nu’udar ema ne’ebé depende ba lukru hosi produsaun ninian rasik, no iha responsabilidade ba desizaun kona ba futuru ninia emprezariu. Iha país seluk, auto-empregu dala barak la rekere nivel konhesementu as. Ekonomista balu konsidera auto-empregu nu’udar parte ida hosi atividade ekonomia informal tanba auto-empregu la involve kontratu formal, ema ne’ebé servisu mos oitoan, no lukru ne’ebé hetan mos relativamente ki’ik (Temkin; 2009; 136). Tuir Organizasaun Traballador Internasionál ka ILO (2013), empregu iha ne’e iha karakteristiku sira hanesan, la hetan pagamentu, servisu extra time, dala barak ema hapara sem kompenzasaun, laiha benefisiu sosial ruma, no laiha asuransia ruma. Tuir estimativa Organizasaun ne’e (ILO; 2013) katak auto-empregu kontribui ba kuaze 50% to’o 75% atividade ekonomia informal tomak, exeptu agrikultura, iha país sub-dezenvolvidu sira. Tuir estudu ida hosi Banku Mundial (2013) kona ba auto-empregu iha país sub-dezenvolvidu 75, maioria hosi ema ne’ebé involve iha atividade auto-empregu servisu ba sira ba an rasik, hetan rendimentu oitoan, no prefere autnomia no flexibilidade.

Iha Timor-Leste, auto-empregu kompstu hosi atividade oioin, hanesan indústria ki’ik iha uma laran,homan tais, no home-based industry sira seluk. Tuir relatório balu, kuaze 50% hosi ema ne’ebé mak ho idade produtivu, servisu iha área ne’e. Agrikultura sei sai nu’udar seitor boot liu hotu iha atividade ekonomia auto empregu nian kompara ho seitor sira seluk. Tuir sensus populasaun 2010 nian,. 83% hosi auto empregu iha Timor-Leste kompostu hosi ema ne’ebé mak servisu iha agrikultura. Iha país foun, no postu-konflitu, iha espetativa katak agrikultura mak sei sai nu’udar makina ba dezenvolvimentu no stabilidade rai laran, tanba hosi seitor agrikultura mak sei kria empregu barak, kria kondisaun ba auto-sufisiensia, seguransa ai-han, no baze ba ekonomia sira seluk. Tanba ne’e mak organizasaun barak sujere katak investimentu iha agrikultura nu’udar xave ba país foun sira. Iha kontextu Timor-Leste, tuir “The State of Nation Report for Agriculture and Fisheries (2008), iha rekoñesementu katak dezenvolvimentu agrikultura hola papel xavi ba dezenvolvimentu tomak país ne’e nian, tanba agrikultura mak fornese segurasa alimentar, rendimentu ba populasaun iha area rural, fornese bahan baku ba seitor indústria, no solusaun ba problema nasionál hanesan dezempregu.

Infelizmente, maski iha ona esforsu barak, no mudansa balu hosi agrikultura subsistensia ba merkadu, no produtividade aumenta, seitor ida ne’e dala barak sofre tanba investimentu ne’ebé ki’ik, infraestrutura baziku ne’ebé la adekuadu, produsaun ki’ik, no dizligadu ho sistema ekonomia formal. Tanba ne’e, seitor agrikultura iha país post-konflitu kategoriza nu’udar atividade ekonomia non-formal nian.

Banku Mundiál, bazeia ba relatório hosi Sensus Populasaun 2010 nian fo sai katak kompara ho 2010, iha redusaun 25% hosi populasaun ne’ebé moris iha area agrikultura. Tuir Survey Traballador 2010 nian (23), 51% hosi familia iha Timor-Leste hetan rendimentu hosi seitor agrikultura. Tuir dadus hosi Ministériu Finansas (OJE 2013; 40), Agrikultura sei sei sai kontributor prinsipal ba ekonomia naun petróleu nian iha tinan 2010, 21.4% hosi PIB naun Petroleu nian mai hosi seitor agrikultura. Iha tempu ne’ebé hanesan, maski agrikultura sei sai kontributor boot liu ba PIB naun petroleu nian, no fiar katak sei emprega maioria Timor oan, kontribuisaun hosi seitor ne’e tun 9% hosi 2006 ho 2010 (OJE 2012; 9). Situasaun ida ne’e implika posibilidade rua. Primeiru, ema ne’ebé mak servisu iha seitor agrikultura la produtivu no aumenta vulnerabilidade ba kiak. Segundu, tanba seitor agrikultura dizliga hosi ekonomia nasionál; ka ekonomia bazeia ba merkadu nasionál nian. Timor-Leste nia kondisaun agrikultura agora la’os uniku. Iha país ne’ebé foin sai hosi konflitu, iha dualismu iha sistema ekonomia país ida nian; iha ne’ebé ekonomia formal integradu ho merkadu nasionál no internasionál, no ekonomia subsistensia ne’ebé la integradu ho merkadu nasionál no internasionál. Iha kontextu ida ne’e, agrikultura Timor-Leste nian tama iha sistema ekonomia non-formal nian, tanba iha karakteristiku hanesan subsistensia, produtividade ki’ik, no la integra ho merkadu. Ho kondisaun ida ne’e, seitor agrikultura la atrai ema, liliu jovem sira atu servisu iha area ida ne’e. Iha Timor-Leste, tuir Banku Mundial, agrikultura iha Timor-Leste sofre hosi problema sira hanesan planeamentu, investiment no problema seluk tan. Ida ne’e indika katak area agrikultura la atrativu ba ema, no ema komesa muda ona hosi seitor ida ne’e lori ba buka seitor sira ne’ebé mak sira bele hetan salariu, hanesan servisu, konstrusaun, fa’an sasan, no sai fungsionariu públiku.

Auto empregu seluk iha Timor kompostu hosi atividade sira hanesan fa’an sasan iha merkadu, kondutor ba mikrolet, angguna, no kios ki’ik sira iha uma laran. Tuir Survey Traballador 2010 nian (viii), iha 176,000 mak involve iha auto-empregu. Obviamente iha Dili laran, auto-empregu as tebes. Survey Traballador iha 2010 konsidera auto-empregu nu’udar “empregu vulneravel” tanba laiha aranjamentu formal, la iha garantia ba sira nia salariu kada fulan, no risku atu sai dezempregu iha situasaun ekonomia difisil. Tuir dokumentu ne’ebé hanesan, 10% hosi familia iha Timor-Leste hetan rendimentu hosi atividade auto empregu; eksklui agrikultura. Tuir hau nia analiza, atividade auto-empregu hanesan fa’an sasan, lori kareta, halo kios, sira ne’e mak konsege salva ema hirak ne’ebé husik seitor agrikultura no muda ba seitor ekonomia ne’ebé mak involve osan maka’as liu. Ida ne’e la’os úniku mai Timor-Leste. Iha país ho kresimentu ekonomia as hanesan India, Indonezia, no sira seluk, auto-empregu mos sei as.

Seitor seluk mak seitor privadu, halai liu ba sira ne’ebé servisu iha seitor hanesan konstrusaun, servisu, no industria. Seitor sira ne’e sei depende maka’as ba gastus seitor públiku nian. Analiza hosi Ministeriu Finansas (OJE 2012; Livru 1, p.9), kresimentu seitor privadu akontese tanba dudu hosi atividade konstrusaun ne’ebé finansia hosi seitor públiku. Iha tempu hanesan, konstrusaun sira ne’e mos dudu ezizênsia ba sasan sira ne’ebé labele importa hanesan rai henek, fatuk, mebel, no sira seluk tan. Bazeia ba relatorio hosi Ministériu Finansas, entre 2006 – 2010, kresimentu seitor indústria no servisu atinzi 121.7%. Em termus de kontribuisaun, atividade seitor privadu kontribui 50.6% PIB naun Petroleu Timor-Leste nian. Tuir

Dadus ikus liu hosi Diresaun Nasionál Estatistika nian hatudu katak ema ne’ebé mak servisu iha seitor privadu iha tinan 2010 hamutuk 46,000 e tal. Númeru ida ne’e bele aumenta tan tanba polítika Governu nian durante tinan tolu ikus ne’e nia laran. Asumi katak kresimentu empergu iha seitor privadu 3% kada tinan, agora dadaun, seitor privadu agora dadaun emprega ema hamutuk 49,000. Tuir dadus hosi Sensus nian, entre traballador sira ne’ebé mak hetan pagametu regular, seitor privadu kontribui 35%, ki’ik liu deit sira ne’ebé hetan pagamentu hosi Governu. Haree ba kada seitor, ema ne’ebé mak faan sasan mak barak liu, tuir fali konstrusaun, depois seitor servisu. Seitor servisu inklui mos atividade sira hanesan tradusaun profesional, no konsultan sira ne’ebé mak Governu kontrata. Bazeia ba orsamentu anual estadu nian, item orsamentu Governu nian ne’ebé halai ba seitor ida ne’e mak liu hosi “Goods and Services.”

Seitor públiku nu’udar seitor ida ne’ebé estratejiku tebes ba dezenvolvimentu Timor-Leste nian agora, ba tempu badak, no ba tempu naruk. Iha tinan 10 oin mai, seitor públiku sei domina ekonomia Timor-Leste nian, no gastus seitor públiku sei dudu atividade ekonomia rai laran. Em termus de kampu du servisu, servisu iha seitor públiku nu’udar seitor ida ne’ebé atrativu liu iha Timor-Leste, tanba hetan pagamentu diak, iha seguransa ba futuru, no benefisiu seluk tan. Maioria hosi ema klase mediu iha Timor, emprega iha seitor públiku, no seitor públiku sai estratejiku ba kresimentu ekonomia iha Timor-Leste. Gastus hosi seitor públiku mak dudu atividade seitor sira seluk hanesan servisu, konstrusaun, agrikultura no seluk tan. Hare ba empregu, tuir dadus hosi Governu nian, iha tinan 2012, ema ne’ebé servisu iha seitor públiku hamutuk 30,000 e tal. Ida ne’e la kalkula ho ema sira ne’ebé mak kontratadu, asesor sira, ne’ebé selu liu hosi bens e servisu. Entre traballador sira ne’ebé mak hetan pagamentu, 46.1% mak sira ne’ebé selu hosi Governu.

Kampu du servisu seluk mak servisu iha ajensia intenasionais sira, embaxada sira, no ONG internasionál no nasionál. Maski laiha dadus klaru kona ba ema hira mak servisu iha area ne’e, servisu iha area ne’e mos atrativu, no ema sira ne’ebé servisu iha area ne’e konsidera nu’udar klase mediu. Servisu iha area ne’e mos iha salariu ne’ebé as, as liu salariu fungsionariu públiku nian, iha kontratu ne’ebé klaru, no dala barak, atrativu liu, kompara ho fungsionariu públiku.

Maioria hosi kampu du servisu sira ne’e konsentra iha Dili, no agrikultura mak barak liu iha distritu sira seluk. Pur ezemplu, auto-empregu iha Dili, obviamente boot tebes. Ita bele haree iha Dalan ninin, sira, taxista sira, mikrolet sira. Maski iha distritu seluk mos iha, maibé kompara ho Dili, númeru auto empregu iha Dili sei as liu tanba atividade ekonomia sei konsentra iha Dili. Fungsionáriu Públiku

Dezempregu iha Timor-Leste no Dezafiu ba future

Tuir sensus populasau 2010 nian, total populasaun Timor hamutuk 1.066 millaun. Hosi total ne’e, Bazeia ba sensus ne’e, labarik (0 – 14) iha Timor hamutuk 574,269 ou 53.85%; idade produtivu (15 – 64) hamutuk 441,906 ou 41.43%, no idozu (65+) hamutuk 50,234 ou 4.7%. Hosi total idade produtivu, sei kategoriza tan ba populasaun ekonomikamente ativu, no sira ne’ebé mak konsidera inativu.  Entre populasaun ho idade 15 – 64, sira ne’ebé servisu hamutuk 278,032. Iha grupu ne’e, sira ne’ebé mak la emprega hamutuk 30,000. Kestaun importante iha Timor mak maski ita iha populasaun ho idade produtivu ne’ebé as, 41% deit hosi sira ne’e mak partisipa iha atividade laboral.

Iha karakteristiku iha leten, bele hare ona katak se ita exklui seitor agrikultura, ema barak mak la servisu, ou inativu. Iha nivel global, ema kalkula persentajem dezempregu bazeia ba númeru populasaun ativu, ho idade tinan 15-64. Iha kestaun balu ne’ebé presiza tau hanesan konsiderasaun, iha kontextu Timor nian. Primeiru, maski idade ativu komesa tinan 15, ema barak iha Timor seidauk remata sira nia eskola sekundaria iha tinan 15, tanba sira hahu eskola tarde, ou tanba sira repete klase durante iha eskola. Tuir dadus kona ba Net-Attendance Ratio, total ema hamutuk 11,670 ho idade tinan 15-17 mak sei iha eskola. Entaun, balu foin remata sira nia eskola sekundaria iha tinan 16, e balu to’o tinan 19.

Maski nune’e, sensus populasaun uza padraun ida ne’e lori kalkula persentajem dezempregu iha Timor-Leste. Tuir dadus hosi sensus populasaun tinan 2010 nian, populasaun Timor kategoriza ba grupu tolu: labarik, idade produtivu, no idozu.

Grafika Tuir mai hatudu kona ba estrutura demografiku Timor-Leste nian, tuir grupu de idade.

Persentajem dezempregu normalmente kalkula hasoru númeru populasaun ho idade ne’ebé ema bolu ekonomikamente ativu. Katak sira ne’ebé la’os iha eskola, ativamente buka servisu. Bazeia ba ne’e, tuir Survey kona ba Forsa Traballador Timor-Leste nian iha tinan 2010; total populasaun ho idade 15 ba leten mak 635,000. Hosi númeru ne’e, 262,000 mak konsidera nu’udar forsa traballador, no restu mak konsidera nu’udar inativu. Sira ne’ebé mak inativu signifika katak, sira la servisu iha semana antes, wainhira survey hala’o hela, no sira la buka servisu. Razaun oioin mak implika ba inativu. Maioria mak sei eskola ou fator idade ou atividade familia. Hosi forsa traballu ne’ebé iha, relatorio ne’e fo sai katak ema na’in 9000 deit mak kategoriza nu’udar dezempregu. Iha parte seluk, Banku Sentral Timor-Leste nian, iha ninia audiensia ho Komisaun C Parlamentu Nasionál foin dadaun ne’e, kona ba OJE 2013, fo sai katak taxa dezempregu iha Timor-Leste atinzi 50% hosi populasaun ho idade produtivu. Se

Maski iha diferensia iha definisaun, iha konsiênsia katak kestaun dezempregu nu’udar kestaun krítiku ne’ebé presiza hetan konsiderasaun sériu iha Timor-Leste. Banku Mundiál, iha 2009 nota katak, kada tinan, ema 15,000 mak tama merkadu traballo iha Timor-Leste. Agora dadaun, hare ba estrutsura populasaun, kada tinan, ema 27,000 mak tama idade produtivu. Maibé hosi sira ne’e, barak mak la buka servisu tamba razaun oioin. Balu tanba sei iha eskola sekundária, balu tanba kontinua ba universidade, no balu tanba sai dependenti ba familia.

Maski nune’e, hanesan explika iha leten, servisu formal no hetan pagamentu di’ak mak sira ne’ebé iha seitor públiku, no seitor privadu balu, no sira ne’ebé mak servisu iha ONG nasionál, ONG Internasionál, no Ajensia Internasionál sira. Pergunta mak oinsa ho sira seluk? Sira ne’ebé la tama iha kategoria ne’e, sira involve iha seitor sira hanesan agrikultura, auto-empregu ne’ebé maioria hanesan vulneravel, sira balu sei iha eskola sekundaria, mais ou menus 30,000 mak iha Universidade sira iha Timor laran, sira seluk iha Universidade sira iha rai liur, no seluk mak dezempregu. Ida ne’e konfirma katak hases-an hosi númeru sira ne’e, ema barak iha Timor mak la iha servisu, agora dadaun. Ba sira ne’ebé mak iha, barak hosi ne’e mak tama kategoria vulneravel; katak risku atu hapara sira nia kontratu as tebes, no laiha seguransa ba sira nia futuru.

graphic

Kestaun dezempregu iha Timor-Leste mosu tanba razaun oioin. Razaun primeiru katak, wainhira ekonomia muda hosi subsistensia ba cash, ema barak muda hosi agrikultura. Iha tempu hanesan, kapasidade seitor non-agrikultura nian atu akomoda ema ne’ebé sai hosi seitor agrikultura seidauk as. Hanesan konsekuensia, ema ne’e muda ba seitor agrikultura tama iha auto-empregu, ou sai dezempregu. Ne’e implika katak ezizênsia ba kampu du servisu seidauk boot. Segundu mak fator kresimentu demografiku. Katak ita nia kresimentu populasaun as liu ita nia kapasidade ekonomia atu sustenta kresimentu populasaun; liliu sira ne’ebé foin moris iha 1999 to’o 2010. Terseiru mak ekonomia ita nian rasik ne’ebé top down, manifesta iha ita nia dependénsia as ba seitor petróleu. Hanesan implikasaun, maski ita iha kresimentu ekonomia ne’ebé atinzi 10%, kresimentu ida ne’e la’os tanba ema barak nia kontribuisaun, maibé tanba sirkulasaun osan hosi seitor petróleu.

Ba futuru, kestaun dezempregu sei sai boot liu tan, haré hosi estrutura demografiku Timor-Leste nian. Iha tinan hitu oin mai, kada tinan, ema mais ou menus 30,000 mak sei tama idade produtivu. Sira ne’e barak mak sei mai hosi labarik sira ne’ebé agora iha idade labarik nian. Sira ne’e bele sai rekursu ka forsa traballu ne’eb’e forte wainhira sira hetan edukasaun ne’ebé di’ak agora. Maibé sira mos bele sai ameasa ba Timor-Leste, wainhira edukasaun ne’ebé sira hetan agora la adekuadu, la prepara sira nia futuru ho di’ak, no oportunidade ba sira atu hetan servisu laiha.

Entre labarik sira ne’ebé agora sei iha idade labarik, sira balu sei tama idade produtivu sem iskola primária, no sira balu la remata eskola sekundaria, no oitoan de’it mak sei konsege tama universidade. Iha tempu hanesan, ita mos sei enfrenta dezafiu oinsa atu akumula sira ne’ebé mak remata ona sira nia eskola iha nivel unversidade. Númeru bele to’o 70,000 to’0 80,000 iha tinan sanulu oin mai. Iha tempu ne’eba, mina hosi Bayu Undan hela oit’oan deit ona. Ida ne’e sei sai nu’udar dezafiu boot ba Timor-Leste. Wainhira ita la prepara kondisaun agora, Timor-Leste sei enfrenta dezafiu boot tebes iha futuru mai, relasiona ho jovem.

Kestaun mak impaktu saida mak Timor-Leste sei hetan wainhira ema barak la servisu, inativu ou dezempregu? Dala barak, iha Timor, kestaun ne’ebé sai preokupasaun mak kestaun seguransa. Ida ne’e los duni. Hanesan rezultadu hosi konsultasaun ba Avaliasaun Frajilidade Timor nian hatudu, iha preokupasaun barak hosi públiku kona ba impaktu hosi númeru dezempregu ne’ebé as ba seguransa iha Timor-Leste. Hanesan esplika iha leten, falla atu kria dezenvolvimentu inklusivu no justu, sei dudu konflitu horizontal iha rai laran. Maibé dezempregu la’os de’it ameasa ba stabilidade.Wainhira país ida ninia sidadaun barak mak inativu ou la servisu, signifika katak produtividade país ne’e oitoan; no ne’e, impaktu ba kresimentu ekonómiku.  Haré ba situasaun agora nian, ho kresimentu ekonómiku ne’ebé mak Timor iha, indika katak kresimentu ne’ebé Timor iha agora, ekslisivu, no la’os kontribuisaun hosi maioria populasaun Timor-Leste nian. Ida ne’e nu’udar preokupasaun públiku agora nian. Hanesan Relatório ba Avaliasaun Frajilidade Timor-Leste nian (2012;16) hatudu “kresimentu ekonomia seiauk distribui ho justu iha teritório tomak. Populasaun iha distritu seidauk haré mudansa boot iha atividade ekonomia.” Estudu foun hosi organizasaun International Crisis Group (2013; 34) fo hanoin mai ita katak iha futuru, asuntu boot rua mak sei bele sai katalizador ba konflitu mak dezempregu no dizigualidade sosial.

Wainhira Timor la aproveita ninia populasaun sira ne’ebé mak ho idade produtivu, Timor-Leste sei lakon oportunidade di’ak ida atu dezenvolve país ida ne’e. Tuir lolos, populasaun ho idade produtivu tenki hare hanesan rekursu ida ba ita. País dezenvolvidu sira hanesan Ikus liu, wainhira ita iha kresimentu ekonómiku maibé populasaun barak mak dezempregu, ne’e katak ema oitoan de’it iha sosiedade laran mak kontribui ba kresimentu ekonómiku no ema barak mak la kontribui ba kresimentu ida ne’e. Ne’e implika katak gap entre riku ho kiak iha sosiedade laran aumenta luan ba bebeik; no ema oit’oan deit mak goja kresimentu ida ne’e. Ikus liu, wainhira dezenvolvimentu haluan gap entre riku ho kiak aumenta ba bebeik, ba nasaun foun hanesan Timor-Leste, ida ne’e hanesan counter productive ba prosesu hari nasaun, tanba parte barak iha sosiedade laran mak senti katak sira marjinalizadu iha sosiedade laran, no la sente katak sira sai nain ba prosesu dezenvolvimentu ne’ebé agora iha. No ikus liu, dezempregu sei sai hun ba pobreza estrutural, no hamosu siklus de pobreza iha rai laran. Wainhira ema barak mak la servisu, sira nia oan mos labele hetan nutrisaun ne’ebé di’ak, sira nia oan labele hetan edukasaun ne’ebé as, no dala barak laiha opsaun ba sira atu hili rasik desizaun ba sira nia moris, limitadu.

Konkluzaun

Hases’an hosi kontradisaun kona-ba definisaun dezempregu, iha preokupasaun komum ida katak dezempregu sai nu’udar dezafiu boot ba Timor iha futuru. Ho faktus katak porsaun boot hosi populasaun ho idade produtivu mak la ativa, ida ne’e iha impaktu negativu ba kresimentu ekonómiku Timor-Leste nian. Ba sira ne’ebé mak agora kategoriza nu’udar empregadu, barak hosi ne’e mak iha pozisaun vulneravel. Iha futuru mai, númeru populasaun ne’ebé sei tama kampu servisu aumenta liu tan. Ho jovem barak mak graduadu hosi sira estudu iha nivel sekundária no universidade, dezafiu sei sai boot liu tan.  Tanba ne’e, presiza dalan pragmátiku balu atu hatan ba ezizênsia ida ne’e.

Advertisements