Relasaun Timor-Leste Indonesia: La’os deit relasaun Estadu Rua

TMR being received by SBY. Photo Courtesy - Jakarta Post

TMR being received by SBY. Photo Courtesy – Jakarta Post

Prezidênti da Repúblika de Timor-Leste, Taur Matain Ruak – TMR – foin remata ninia vizita internasionál ba dahuluk iha Indonezia no Nova Zelandia. Rezultadu hosi vizita ne’e, Prezidênti da Repúblika karakteriza nu’udar “Positivu tebes.” Objetivu prinsipál hosi vizita rua ne’e mak hanesan jestu agradesimentu ida ba xefi du estadu país rua nian tanba partisipa iha selebrasaun aniversariu ba dala sanulu restorasaun independénsia Timor-Leste nian iha 20 de Maiu 2012, no mos seremonia tomada de pose Prezidênti atual de Timor-Leste. Iha tempu hanesan, vizita rua ne’e mos atu reve koperasaun entre Timor-Leste ho Indonezia no mos entre Timor-Leste ho Nova Zelandia.

Espesial kona-ba ba vizita ba Indonezia, vizita ida ne’e “positivu tebes” duni. Prezidênti rua komete katak relasaun país rua la’os de’it kona ba relasaun estadu, maibé mos kona ba relasaun entre povu no povu, no ligasaun emosional importante. Komitmentu ida ne’e mos obviamente bele hare iha mensajem polítika, no jestu polítika parte rua nain.

Atividade ne’ebé hala’o iha Jakarta mak primeiru, Prezidênti da Repúblika halo vizita ba iha Semiteriu Eroi Nasional, Kalibata. Iha ne’e, Prezidênti fo omenajem, hodi observa minutu ida du silensiu ba Eroi Indonezia nian sira no tau aifunan ba Eroi sira. Ida ne’e hanesan jestu ida hosi xefi estadu Timor-Leste nian atu hato’o sira nia omenajem ba eroi sira ne’ebé fo sira nia vida lori hari nasaun no estadu Indonezia nian. Depois de omenajem iha Simiteriu Eroi  Kalibata, Prezidênti da Repúblika hamutuk ho Primeira Dama no komitiva ba Istana Merdeka, Palasiu Prezidênti Indonezia nian. Iha ne’eba, Prezidênti Susilo Bambang Yudhoyono – SBY – hamutuk ho Primeira Dama Indonezia nian, Señora Ani Bambang Yodhoyono simu Prezidênti da Repúblika Timor-Leste ho nia komitiva ho seremonia estadu nian hanesan Guarda da Onra, toka Ino Nasionál país rua nian, tiru morteiru, inspesaun ba Guarda da Onra, no sesaun hasai foto.

Tuir fali mak Prezidênti da Repúblika no Primeira Dama enkontru Téte – a – Téte ou konversasaun oioin restrita entre lider rua. Iha ne’e, lideransa hosi país rua manifesta sira nia intensaun diak no komitmentu entre parte rua atu mantein no haforsa relasaun entre país rua. Hosi parte Indonezia nian, Prezidênti SBY hateten katak vizita ida ne’e hanesan onra ba estadu Indonezia no mos ba nia rasik. No Prezidênti SBY iha desejo katak relasaun entre país rua sei metin nafatin, no haforsa liu tan, ho lideransa foun Indonezia nian, depois de eleisaun tinan oin.

Prezidênti TMR agradese ba Prezidênti SBY ba konvite hosi Indonezia. Prezidênti TMR espresa importansia hosi relasaun amizade entre país rua, no deseja atu haforsa liu tan. Prezidênti TMR mos deseja atu Prezidênti SBY hamutuk ho eis Prezidênti Timor-Leste nian rua; Xanana Gusmao no Jose Ramos Horta atu patroniza Forum Amizade entre Timor-Leste no Indonezia. Hosi parte Timor-Leste nian, konvida mos Prezidênti SBY atu vizita fila fali Timor-Leste antes termina ninia mandatu. Prezidênti TMR mos informa kona ba dezenvolvimentu iha rai laran, intensaun Timor-Leste nian atu integra-an iha rejiaun laran, dezafiu hirak ne’ebé Timor enfrenta, no mos prioridade hosi programa dezenvolvimentu Timor-Leste nian.

Vizita ida ne’e mos nakonu ho asaun umana no emosional entre Prezidênti rua, no manifestasaun hosi sira nai komitmentu atu mantein relasaun diak ne’ebé kuda ona durante ne’e. Iha enkontru Téte – a – Téte, buat ne’ebé interesante mak istória pesoal, nu’udar umana ida, no nu’udar ajente istória ba prosesu luta Timor-Leste nian. Parte rua iha id-idak nia istória, esperiénsia, no memoria pesoal rasik kona ba fatin balu iha Timor-Leste; maski parte rua uluk luta iha liña ne’ebé diferente. Ida ne’e hatudu kona ba ligasaun emosionál hosi Prezidênti Indonezia nian mai Timor-Leste.

Ligasaun emosionál nafatin manifesta hosi Prezidênti SBY durante enkontru bilateral. Iha enkontru Bilateral, Prezidênti TMR hato’o ninia deseja kona ba koneksaun emosional ne’ebé kesi povu rua. Prezidênti SBY mos aseita ho sujestaun hosi Prezidênti TMR atu tama iha Forum Amizade entre país rua. Durante enkontru bilateral, Prezidênti SBY manifesta ninia ligasaun pesoal ho rai Timor, wainhira la uza tradutor durante enkontru bilateral no konferensia imprensa, maski Prezidênti TMR uza lian Tetum iha enkontru. Maski laiha tradutor, konversasaun la’o di’ak no sei komprende intensaun hosi Prezidênti TMR nian. Prezidênti TMR mos deseja atu relasaun país rua sei metin liu tan, depois de Prezidênti SBY ninia mandatu.

Durante vizita, parte rua asina Nota Intendimentu Tolu. Sira ne’e mak Addendum No.1 to te Provisional Agreement between Timor-Leste and Indonesia on the Land Border, Visa eezemption for the diplomatic service passports, and Joint Statement on the launching of the Opening three border crossing points (Tunubibi-Haekesak/Turiskain, Memo-Builalo, and Passabu-Haumeniana.

Vizita ida ne’e dala ida tan fortifika liu tan relasaun entre país rua nian. Hosi mensajem polítika no jestu polítika sira ne’e, Prezidênti rua ne’e indika sira nia intensaun atu haforsa relasaun entre país rua, la’os iha nivel estadu deit, maibé mos relasaun povu ho povu sai importante ba sustentabilidade país rua. Tanba e’e, hanesan Prezidênti TMR deseja, país rua labele iha det koneksaun polítika, maibé mos koneksaun emosional ne’ebé kesi país rua hamutuk.

Advertisements