Dizigualidade iha Timor-Leste: Dezafiu ba Sosiedade

Guteriano Neves

Asesor Peskiza no Analiza

 

Iha fulan Juñu nia laran, Diresaun Nasionál Estatístika publika relatório tolu ne’ebé fo informasaun importante ba kondisaun Timor-Leste nian agora. Relatório tolu ne’e mak “Timor-Leste Household Income and Expenditure Survey, 2011, Business Activity Survey, 2011, no Timor-Leste National Accounts 2000 – 2011. Relatório tolu ne’e haforsa no reforsa tan buat barak ne’ebé durante ne’e ema preokupa. Notas ida ne’e subliña buat balu ne’ebé ha’u hanoin importante atu tau konsiderasaun ba ita tomak.

Ekonomia la’o tanba gastus seitor públiku

Primeiru mak ita nia ekonomia rai laran la’o tanba seitor públiku mak domina. Ida ne’e buat ne’ebé akontese dala barak iha país ne’ebé foin hetan independénsia no país ne’ebé depende maka’as ba seitor petróleu. Iha kontextu global agora, partikularmente iha rejiaun ne’e Azia Pasifik, gastus públiku mak dudu kresimentu ekonomia. Maski nune’e, iha Timor, ita nia kontextu presiza hetan atensaun maka’as, partikularmente ba sustentabilidade ekonomia no fiskal país ida ne’e nian.

Seitor petróleu kontinua atu domina ekonomia Timor-Leste nian, partikularmente komesa 2004, wainhira Timor-Leste komesa simu rendimentu hosi Zona Dezenvolvimentu Petroleu Konjunta ka Joint Petroleum Development Area. Iha 2011, hosi total GDP Timor-Leste nian mak $5.797 billoens, $4.669 billoens mai hosi seitor petróleu, ou ekivalente ho 80.5%. Kompara ho 2010 nian, ida ne’e aumenta 2.6%. Em termus de Gross National Income, iha 2010 no 2011, 61.5% no 61.7% hosi rendimentu nasionál mai hosi  petróleu. Em termus kontribuisaun gastus – expenditure – ba GDP Timor-Leste nian, gastus hosi governu mak domina. Maski iha 2004 no 2005, gastus privadu sei as liu gastus seitor públiku, maibé, dezde 2006, gastus governu nian aumenta signifikante no ultrapasa gastus privadu nian. Iha diskonfia maka’as katak ne’e karik tanba rendimentu hosi seitor petróleu ne’ebé aumenta maka’as, no dudu orsamentu jeral du estadu atu sa’e dezde 2008 to’o agora. Iha nivel uma kain, 57% hosi rendimentu salariu uma kain nian mai hosi governu. Ida ne’e hatudu tan kona ba dominasaun seitor públiku iha estrutura ekonomia uma kain nian mos.

Hare ba kada seitor, kresimentu as liu akontese iha seitor konstrusaun. Iha 2011, kresimentu seitor konstrusaun nian atinzi 40.5%, tuir fali ho komunikasaun ne’ebé mak atinzi 33.8%, no administrasaun públiku sa’e 25% kompara ho tinan 2010. Seitor sira ne’e diretamente liga ho gastus seitor públiku. Hanesan ita hatene katak dezde 2011 to’o agora, gastus governu nian ba infraestrutura fízika aumenta maka’as haré hosi alokasaun orsamentu jeral du estadu, liu hosi kriasaun fundu infraéstrutura. Gastus sira ne’e mak dudu kresimentu ekonomia Timor-Leste nian.

Faktus katak seitor infraéstrutura aumenta maka’as implika mos ba kompozisaun kampu du traballu iha Timor-Leste. Tuir Business Activities Survey 2011 nian katak hosi total 58,200 ema ne’ebé servisu iha seitor privadu, infraéstrutura kontribui 30.9%, ka boot liu area sira seluk hanesan fabrikasaun, fa’an sasan, akomodosan no aihan, no mos indústria sira seluk.

Dizigualidade: Dezafiu ida

Dizigualidade iha Timor-Leste nu’udar asuntu ne’ebé ema barak toka ona durante ne’e, no obviamente ita bele haré wainhira ita la’o iha dalan iha Dili, no ita ba distritu sira. Dizigualidade iha Timor akontese entre ema riku ho kiak, entre area urban no rural no mos entre feto no mane. Hare ba relatório hosi “Household Income Survey, 2011,” 10% hosi populasaun Timor-Leste mak simu boot liu $131.67 kada fulan kompara ho 50% mak simu menus liu $40 kada fulan.” Ho liafuan seluk, 10% hosi populasaun Timor mak hetan rendimentu boot liu dala tolu ba leten, duke 50% populasaun Timor. E 40% hosi populasaun Timor mak moris ho $30 ou menus kada fulan, signifika katak $1 kada dia ou menus hosi ne’e.

Differensia ne’ebé sai nu’udar supreza boot mak differensia rendmentu entre uma kain. 10% uma kain riku liu simu $832 kada fulan kompara ho 10% kiak liu ne’ebé simu 49 dollar. Signifika katak uma kain ne’ebé riku nia rendimentu boot kuaze dala 16 duke 10% ne’ebé iha okos.

Hare ba rendimentu kada uma kain, differensia entre area urban no area rural, kada uma kain iha area urban nia rendimentu boot liu dala rua duke kada uma kain iha area rural. Hare ba rendimentu kada ema – percapita – total rendimentu kada ema iha area rural ki’ik liu total rendimentu nasionál ne’ebé to’o $62 kada fulan, no kada ema iha rural simu deit $50 kada fulan. Ema iha area urbanu nia rendimentu hosi salariu boot liu dala haat duke rural. Maioria rendimentu kada uma kain iha area rural mai hosi agrikultura, peskas, no atividade relasona ho floresta.

Hare ba gastus, iha differensia boot mos entre uma kain ou kada ema nia gastus iha area urban ho sira iha area rural. Kada ema no kada uma kain iha area urbanu gasta boot liu dala rua duke sira iha area rural. Kada familia iha area urbanu gasta $531 kada fulan, $278.92 hosi ne’e,  la’os gasta ba hahan. Familia iha area rural gasta $218 kada fullan no $89 hosi ne’e halai ba aihan. Implika mos katak gastus uma kain iha area rural menus liu duke gastus uma kain iha nivel nasionál. Differensia boot mos akontese iha gastus kada ema entre area urban no area rural. Kada ema iha area rural gasta $37 kada fulan, kompara ho $77.86 iha area urban.

Hare ba distritu, gastus kada ema iha Dili boot liu dala rua kada ema iha distritu sira seluk iha Timor laran tomak. Kada ema iha Oe-Cusse mak ki’ik liu, ho gastus $0.80 kada loron, no 61% populasaun Oecusse mak gasta menus de $1 dollar kada loron. Iha Dili 11% de’it mak gasta ki’ik liu $1 kada loron. Iha Timor laran tomak, 37% mak gasta menus $1 kada loron.

Dizigualidade entre area urban no area rural mos bele hare iha kontextu distribuisaun kampu du servisu iha Timor laran tomak. Bazeia ba relatório kona ba Business Activities Survey Report, 80.5% servisu iha setor privadu, sentraliza iha Dili, no distritu 12 seluk fahe deit 19.5% hosi total 58,200 empregu e’ebé iha.

Dizigualidade boot mos bazeia ba jeneru, entre feto no mane. Iha nivel nasionál, mane sira nai rendimentu kada fulan boot liu dala tolu duke rendimentu feto nian. Em termus de rendmentu saláriu, mane nia rendimentu boot liu dala hat duke feto. No hosi ema ne’ebé mak servisu iha seitor privadu, 74.5% hosi ne’e mane, no restu mak feto. Iha seitor konstrusaun, seitor boot liu no sa’e maka’as, hosi traballador 18,000k, feto kontribuide’it 9.4%.

Hosi ne’e ita bele nota direitamente katak ema sira ne’ebé mak servisu iha administrasaun públiku, maiória fungsionáriu públiku, konsultores sira ne’ebé hetan kontratu hosi seitor públiku, no seitor privadu. Sira ne’e mak hamutuk 10% hosi populasaun ne’ebé nia rendimentu $135 ba leten. Ida ne’e nu’udar fenomena ida hosi país sira ne’ebé iha dependénsia as ba mina, iha ne’ebé, iha sira ne’ebé riku, ka rendimentu as, liga direitamente ho seitor petróleu.

Agrikultura kontinua sofre

Seitor ne’ebé presiza hetan ita nia atensaun maka’as mak seitor agrikultura. Maski durante ne’e ita asumi katak agrikultura mak kontributor ba ekonomia Timor-Leste nian, relatório ne’e prova katak ita  dezde 2000 to 2011, ita nia agrikultura la’o iha fatin de’it. E entre 2010 no 2011, seitor agrikultura tun 19.6%. Hanesan Household Survey Report prova, iha area rural, 56% hosi rendimentu kada ema mai hosi seitor agrikultura, peskas no floresta.  No haré hosi númeru uma kain ne’ebé mak hela iha area rural, tuir sensus 2010, 75% hosi uma kain Timor-Leste mak moris iha area rural. Ho situasaun hanesan ne’e, investimentu ne’ebé ki’ik iha area agrikultura signifika katak ita la dun fo importánsia ba maioria populasaun Timor ne’ebé moris iha area rural.

Ida ne’e bele implika kondisaun rua. Primeiru, ema muda hosi seitor agrikultura ba seitor sira seluk, hanesan konstrusaun ou servisu. Kondisaun ida ne’e bele defende se ita hare hosi mudansa iha kampu du servisu entre 2010 no 2011, iha ne’ebé ema servisu iha seitor privadu aumenta 10,000. Implikasaun seluk mos katak rendimentu ema iha área rural menus tan, ida ne’e haré ba kompozisaun rendimentu uma kain iha area rural, iha ne’ebé 56% mai hosi agrikultura. Maski iha kresimentu ba ema e’ebé mak servisu iha area seitor privadu, 80% hosi ne’e sentraliza iha Dili. Implika katak laiha mudansa ba povu iha area rural, ne’ebé mak sei depende hosi agrikultura.

Konkluzaun

Ita hotu iha Timor konsênte kona ba situasaun ekonomia iha Timor-Leste; iha ne’ebé siklu ekonomia la’o tanba atividade seitor públiku. Ita hotu mos konsênte kona ba de faktus katak dezenvolvimentu ekonomia agora la ekitavel, seidauk inklusivu, no la sustentavel ba longu prazu. Relatório hirak ne’e konfirma saida mak durante ne’e ema barak koalia sai no preokupa. Prezidênti da Repúblika, iha ninia mensajem dala barak hato’o preokupasaun kona ba asuntu ne’e; dizigualidade,  menus de produsaun, dependénsia ba importasaun, no prezensa estadu iha area rural. Primeiru Ministru mos iha ninia mensajem foin dadauk ne’e konsente tebes ho realiadade iha leten lori rekoñese katak kresimentu durante ne’e akontese tanba investimentu públiku. Tuir nia “kresimentu ekonómiku so bele konsidere indikador pozitivu ba dezenvolvimentu nasionál wainhira iha prinsípiu fundamental:inklusivu no ekidade.”

 

Advertisements