Tags

, ,

Agrikultura Orgániku Eskala-ki’ik no nia Importansia ba Timor-Leste

 Maximus Tahu

Introdusaun

Dezeñu ba projetu agrikultura-nian barak iha Timor-Leste refleta idea katak sistema tradisional ne’ebé agora dadaun iha presija hetan mudansa tanba fo rezultadu kolleita ne’ebé ki’ik liu. Espektasaun husi mudansa ne’e katak sistema konvensional sei hasa’e kolleita, hasa’e agrikultór sira-nia rendimentu no hadi’ak agrikultór sira-nia moris. Pergunta ne’ebé mosu mak, konsidera Timor-Leste nia karakterístika geográfiku, ekonomia no sosio-kultural, no mos kondisaun iha merkadu international agora, mudansa ne’e bele fo benefisiu too bainhira. Artigu ne’e se la diskute klean problema sira ne’ebé asosia ho agrikultura konvensional maibé se buka atu fo razaun hodi hatudu katak Timor-Leste sei hetan benefisiu diak liu se Timor-Leste kaer metin nafatin pratika tradisional sira ne’ebé diak no dezenvolve sistema agrikultura orgániku eskala-ki’ik ne’ebé adapta diak liu ba Timor-Leste nia kondisaun. Pontu importante iha artigu ne’e mak diskusaun badak kona ba situasaun global nian relasiona ho agrikultór orgániku eskala-ki’ik, benefisiu ne’ebé Timor-Leste bele hetan husi sistema ne’e no dezafiu balu ba oin.

Agrikultura orgániku eskala-ki’ik iha mundu

Agrikultura orgániku eskala-ki’ik mak sistema agrikultura ida ne’ebé hala’o iha eskala ne’ebé ki’ik no la uja ai-moruk kímiku no reduz uju mákina bo’ot sira. Maski prátika agrikultura tradisional nian hotu konsidera hanesan orgániku, sistema ne’e konsidera ba dahuluk hanesan alternativa ba sistema konvensional, iha rai sira ne’ebé koalia Ingles no Aleman iha fin de sekulu 19 (Vogt, 2007, p. 9). Konseitu eskala-ki’ik la’os deit refere ba toos nia luan. Definisaun los liu, tuir Professor Economia Harvard nian, T.N Carvers, maka toos ne’ebé familia mak hala’o no labele hetan benefisiu husi uju makina bo’ot tanba ki’ik liu (Carvers, 1991). Tanba ne’e sistema ne’e dalabarak ema hanaran sistema orgániku familiar ka bazeia ba familia.

Sistema orgániku ema promove ona desde inisiu sekulu 20 maibé foin iha tinan 1970 hanesan ne’e mak sistema ne’e hahú hetan atensaun maka’as tanba ema nia atensaun ba problema ambiental mos hahú makaas liu tan iha tempu ne’ebá. Hahú husi ne’ebá, kresimentu agrikultura orgániku nian sai makaas liu tan. Iha tihan 1990, area ne’ebé ema kuda ho sistema orgániku hamutuk 11 Millaun hektares deit, iha tinan 2012 sa’e maka’as ba 37.5 Millaun hektares (Figura 1). Pordutu orgániku ne’ebé fa’an iha mundu tomak hetan folin too US$28 Billaun (IFOAM, 2006). Dezenvolvimentu agrikultura orgániku ne’ebé makaas mosu tanba konsumidores sira nia atensaun kona-ba impaktu husi produtu ne’ebé sira konsumu ba sira nia saude no impaktu ba ambiente sai maka’as ba bebeik, no mos tanba governu iha nasaun barak komesa fo suporta maka’as ba sira nia agrikultór orgániku sira (Lockeretz, 2007. p.1).

Maxi Grafik

Figura 1. Kresimentu global rai ba agrikultura orgániku (Fontes: FIBL-IFOAM-SOEL-Survey 1999-2004)

Rezultadu peskiza husi matenek-nain barak hatudu katak mudansa global ba agrikultura orgániku eskala-ki’ik sei kontribui ba hamenus kiak iha mundu tomak, liu-liu iha nasaun sira ne’ebé foin dezenvolve-an. Peskizador rua husi Universidade Essex iha Englatera, Jules Pretty no Rachel Hynes, bazeia ba sira nia investigasaun hatudu katak iha nasaun dezenvolve-an sira ne’ebé numeru ema kiak maka’as, projetu agrikultura orgániku barak hatudu kresimentu kolleita too 93%. Observasaun ne’ebé hanesan fo sai iha relatoriu Organizasaun Nosoens Unidas nian ba assuntu Komersiu no Dezenvovliment (UNCTAD) iha 2013 (Wake Up Before It Is Too Late). Apoiantes agrikultura orgániku eskala-ki’ik sira rekoñese katak iha inisiu, bainhira foin muda husi sistema konvensional ba orgániku, kolleita sei tun uitoan, maibé hafoin tinan balu, kolleita sei sa’e ba bebeik tanba rai komesa rekupera-an no sai bokur liu tan ho pratika orgániku sira. Iha eksperiênsia ne’ebé hala’o husi (Scow et al. 1994) iha toos haat ne’ebé jere ho sistema diferente hatudu katak, hafoin tinan haat, rai iha toos ne’ebé uja sistema orgániku riku liu ho nitrogênio no iha pH ne’ebé konsistente liu kompara ho rai ne’ebé uja sistema konvensional. Hafoin tinan rua, nivel materia organika, fósforo no potássio nian mos aas liu iha rai ne’ebé uja sistema orgániku (Scow et al., 1994).

Nasoens Unidas mos rekoñese importansia husi sistema orgániku eskala-ki’ik. Relatoriu husi Relator Especial ba Direitu ba Ai-han iha 2010 oferese analiza ne’ebé klean no evidensia husi nasaun barak katak agrikultura eskala-kiik ne’ebé livre husi kompañia bioteknologia sira mak sei bele hamenus kiak iha area rural sira. Dependensia ba kompañia sira hanesan Monsanto, Syngenta, Bayern, BASF and DuPont sai kauza lakon bo’ot ba agrikultór barak ona iha mundu tomak. Relatoriu foun liu husi Konferensia Nasoen Unidas nian ba Merkadu no Dezenvolvimentu 2012, Wake up Before It Is Too Late, husu ba mundu tomak atu muda husi sistema konvensional ne’ebé agora domina agrikultra ba sistema ne’ebé sustentavel liu hanesan agrikultura orgániku eskala-ki’ik. Sistema ne’e kontrariu ho sistema industrializadu no konvensional ne’ebé involve produsaun eskala bo’ot no makina bobo’ot sira.

Benefisiu husi Agrikultura orgániku eskala-ki’ik ba Timor-Leste

  • Agrikultura orgániku bele hasa’e kolleita hanesan mos agrikultura konvensional, maibé agrikultura orgániku fo benefisiu liu tanba la estraga rai no hadiak rai nia bokur naturalmente.

Hanesan prova ona husi peskizador barak, agrikultura orgániku bele produs makaas hanesan mos sistema konvensional. Problema iha Timor-Leste, sistema tradisional seidauk fo produsaun masimu, maibé la signifika katak sistema tradisional ne’e mak ladiak tanba iha fatores barak mak fo influensia ba kuantidade husi kolleita. Fatores sira ne’e en geral fahe ba: fatores klimatiku, rai, ai-horis, no sosio-ekonomia (Fageria, 1992, p.3). Fatores klimatiku inklui bee, temperatura, no radiasaun solar. Fatores ai-horis inklui ai-horis nia espesies no variedade. Fatores rai inklui fatores kímiku no fíziku sira ne’ebé afekta ai-horis. Fatores socio-ekonomia nian mak hanesan produtu nia folin, efisiensia husi servisu estensaun nian no teknologia ne’ebé iha (Fageria, 1992, p.3).

Fatores sira ne’e hotu fo influensa ba kuantidade kolleita iha Timor-Leste. Estudu ida ne’ebé hala’o husi Thompson (2011) kona ba Timor-Leste nia rai no geologia hatudu katak Timor-Leste iha rai ne’ebé diferente teb-tebes husi fatin ida ba fatin seluk. Estudu ne’e deskreve, bazeia ba mapa rai original Portuguesa nian, katak Timor-Leste iha rai ne’ebé la hanesan maski iha area ki’ik oan ida deit (Thompson, 2011). Variedade ne’ebé makaas fo impaktu ba produtividade ne’ebé la hanesan tanba ne’e presija tratamentu ne’ebé espesifiuku ba rai ida-ida bazeia ba rai ida-idak nia karakteristiku. Fatores klimatika fo impaktu ba kolleita liu-liu tanba mudansa klimatiku resulta iha udan ne’ebé tun la tuir nia tempu no temperatura sa’e ass. Fatores ne’e hetan rekonñesimentu iha Fini ba Moris no Ministeriu Agrikultura nia relatoriu ne’ebé fo sai katak alterasaun klimatika sei afekta setor agrikultura no liu-liu sei hamenus kolleita (Seed of Life, 2010). Fator seluk, hanesan falta de rekursu atu kontrola peste mos sai hanesan fator ida ne’ebé hamenus kolleita. Kazu konkretu ida relata iha La’o Hamutuk nia relatoriu, Valoriza Agrikultór-sira nia Lian no Matenek (Ferreira et al., 2011, p.4).

  • Ho area agrikultura nian ne’ebé ki’ik, sistema agrikultura orgániku eskala-ki’ik serve liu ba Timor-Leste. Timor-Leste nia rai maioria foho tanba ne’e importante atu konsentra ba diversifikasaim produtu ne’ebé adapta ba karakteristika rai no topografia Timor-Leste nian.

Organizasaun Nasoen Unidas nian ba Agrikultura no Ai-han (FAO) nia infromasaun iha 2011 hatudu katak Timor-Leste nia total area agrikultura nian hamutuk 360,000ha deit, ne’ebé kompostu husi rai arable 150,000ha, 150,000ha area ho pastagens permamente no prados, no 60,000 ha area ho ai-horis agrikultura permanente (e.g. kafe). Relatoriu husi ADB no UNICEF hatudu katak 24% uma-kain iha Timor-Leste sai nain ba rai ho luan menus husi 0.5ha no 60% iha rai entre 0.5 to 2.0ha (Oxfam Australia, 2008). Bazeia ba governu nia estimatizasaun, kada ema ida iha Timor-Leste iha rai 0.4ha (Oxfam Australia, 2008). Ho area ne’ebé ki’ik hanesan ne’e konsekuentemente produsaun sei ki’ik no se uja sistema konvensional kustu produsaun nian sei aas liu. Ne’e bazeia ba eskala ekonomia nian iha setor agrikultura, katak, kustu produsaun nian bratu liu bainhira area ne’ebé halo luan liu no kustu sei karun liu baihira area ne’ebé halo kiik oan deit. Razaun ne’e mak dudu agrikultór sira iha nasaun ne’ebé ho rai bo’ot hanesan Australia, Estadus Unidus no nasaun sira iha Eropeia muda-an bebeik ba toos ne’ebé luan liu (Hooper, 2002; MacDonald, 2011). Ba Timor-Leste, laiha opsaun atu muda ba rai ne’ebé bo’ot liu, tanba limitasaun iha rai. Tanba ne’e, dalan ne’ebé diak liu ba Timor-Leste mak liu husi diversifika produtu agrikultura bazeia sistema eskala-ki’ik ho dalan orgániku atu nune’e bele hasa’e produsaun ho kustu ne’ebé ki’ik liu. Opsaun ba agrikultura orgániku justu liu ba toos-nain sira tanba sistema ne’e sei elimina no reduz kustu ba ai-moruk kímiku sira no mos makina bo’ot sira. Husi pontu de vista sosial no kultural nian, sistema ne’e sei haforsa kultura servisu hamutuk ne’ebé Timor-Leste iha kleur ona (Ferreira, 2011, p.6) atu nune’e hametin liu tan relasaun entre membru komunidade sira.

Timor-Leste labele kompete ho nasaun bo’ot sira en termus de kuantidade no folin produtu nian maibé Timor-Leste bele kompete liu husi produz produtu ne’ebé iha kualidade ne’ebé aas liu.

Ho rai ne’ebé ki’ik, Timor-Leste susar atu produz produtu iha eskala ne’ebé bele kompete ida merkadu internasional, maibé bazeia ba kondisaun merkadu internasional agora Timor-Leste iha oportunidade diak liu atu kompete se Timor-Leste foka ba produz produtu orgániku. Merkadu ba produtu organik iha Eropeia hatudu kresimentu 6% iha 2012, ho valor too 23 Billaun EUR. Merkadu ai-han orgániku iha Australia kontinua dezenvolve no relatoriu ida iha 2012 husi ‘Biological Farmers of Australia’ relata katak valor merkadu orgániku nian hamutuk 300 million kada tinan, no kada tinan ema Millaun ida iha Australia regularmente sosa produtu ne’ebé kuda ho sistema orgániku. Iha Asia rai 4.0 millaun hektares mak hetan ona sertifikadu orgániku. Iha Estadus Unidus valor produtu orgániku ne’ebé faan sa’e husi 1.0 Billaun iha 1990 ba 26.7 Billaun iha 2010 (Fonte: Organic Trade Association’s 2011 Organic Industry Survey).

Maski iha kresimentu makaas iha toos no merkadu ba produtu orgániku maibé nasaun barak, liu-liu Estadus Unidus no nasaun sira iha Eropeia sei sofre falta iha supply produtu orgániku nian (Organic Monitor, 2014). Tanba ne’e, maski objetivu prinsipal Timor-Leste nia agrikultura maka produz ai-han natoon ba konsumu rai laran, Timor Leste mos tenki haree ne’e hanesan oportunidade ida atu okupa fatin balu iha merkadu internasional ba produtu agrikultura nian. Lee oportunidade iha merkadu internasional importante, laos atu dudu agrikutor sira hodi kuda deit produtu ne’ebé folin diak iha merkadu internasional, maibé atu sai hanesan matadalan ba dezeña industria ki’ik ba produtu agrikultura ne’ebé koresponde ba nesesidade rai laran no mos bele hetan folin diak iha liur bainhira iha surplus. Se agrikultor sira kuda uja sistema konvensional, Timor-Leste nia produtu orijinal (hanesan sabraka) ka produtu sekundaria (hanesan jus sabraka) sei susar atu hetan folin diak iha merkadu internasional (lee: Vantajen komparativu). Kona ba ne’e Timor-Leste bele aprende buat importante rua husi esperiensia ho esportasaun kafe. Ida, desde independesia kafe hetan asesu diak liu ba merkadu internasional, liu-liu tanba Timor-Leste nia kafe ne’e orgániku no kuda husi agrikultór ki’ik sira. Rua, Timor-Leste lakon osan barak husi setor kafe tanba Timor-Leste laiha industria kafe ne’ebé forte iha rai laran.

  • ‘Timor-Leste: Nasaun Agrikultura Orgániku’ bele sai hanesan karakteristiku uniku ida iha mundu ne’ebé ai-moruk kimiku sira destroi ona natureza iha fatin barak. Ne’e setor ida ne’ebé bele dezenvolve atu garantia balansu iha ekologia no mos kria oportunidade diak liu atu dezenvolve turismu komunitariu iha area rural, nune’e bele sai hanesan fonte rendimentu adisional ba komunidade sira.

Fatin ida nia karakteristu ne’ebé uniku sai hanesan motivasaun importante ida ne’ebé dada ema atu mai vizita fatin ne’e. Timor-Leste ne’ebé situa besik nasaun rua ne’ebé hetan vizita husi ema millaun ba millaun kada tinan, Indonésia no Australia, tenki iha karakterisku uniku ida ne’ebé sai hanesan ‘pull factors’, fatores ne’ebé dada ema mai vizita Timor-Leste. Fatores ne’ebé ‘dada’ ema ne’e inklui klima, tasi-ibun, fatin nia moos, fasilidade rekreiu, atrasaun kultural no panorama natural (Dann 1977 cited in Beeton, 2006, p.40). Agrikultura orgániku, integra ho turizmu komunitaria ne’ebé oferese oportunidade ba vizitantes sira atu moris no koko esperiensia no kultura lokal bele sai hanesan ‘pull fator’ forte ida ba Timor-Leste.

Agrikultura orgániku laos buat ida ne’ebé foun, maibé “Nasaun Agrikultura Orgániku” buat ida ne’ebé foun ne’ebé bele sai karakterisku uniku ne’ebé bele sai Timor-Leste nia ‘pull factor.’ Karakteristiku ne’e sei fo influensia makaas liu duke hari fatin luxu sira ka hotel fitun lima sira ne’ebé turista sira bele hetan iha nasaun barak. Modelu ne’e mos sei lori benefisiu barak liu ba komuniade sira iha area rural tanba vizitante ka turista sira ne’ebé mai vizita Timor-Leste tanba ‘pull factor’ hanesan temi ona ne’e, sei gasta osan barak liu atu hela iha akomodasaun komunidade nian no sosa komunidade nia produtu sira, duke turista sira ne’ebé mai Timor-Leste tanba fatin luxu sira.

  • Agrikultura orgániku eskala ki’ik kontribui ba mitigasaun mudansa klimatika nian. Ne’e kria oportunidade diak liu atu hetan fundu relasiona ho mudansa klimatika ne’ebé bele uja ba proteze ambiente no dezenvolve diak liu tan komunidade nia moris

Setor agrikultura hetan impaktu maibé mos kontribui ba mudansa klimatika. Sistema agrikultura konvensional kontribui bo’ot ba emissaun gases de efeitu estufa ka greenhouse gasses. Relatoriu husi International Trade Centre UNCTAD/WTO no Research Institute of Organic Farming konklui katak agrikultura orgániku mak sistema ida ne’ebé diak liu en termus de mitigasaun ba mudansa klimatika. Konkluzaun ne’e bazeia ba estudu ne’ebé klean ba estudu sientifiku barak. Ba agrikultór sira iha Timor-Leste, adopta sistema agrikultura orgániku eskala-ki’ik signifika katak sira kontribui ba esforsu global hadiak mudansa klimatika liu husi hatun emisaun husi makina bo’ot sira no mos kimiku sira. Ekonomikamente, sei iha oportunidade ne’ebé diak atu hetan fundu husi rai liur ne’ebé relasion ho mudansa klimatika no meiuambiente ne’ebé se uja ho didiak sei fo benefisiu diak ba komuniade.

 Dezafiu no oportunidade

Maioria toos no natar iha Timor-Leste oras ne’e hala’o ho sistema tradisional ne’ebé uja mos prinsipiu agrikultura orgániku balu, maibé too agora kolleita sei ki’ik. Ba apoiantes agrikultura orgániku sira, dezafiu mak atu prova katak sistema orgániku bele hasa’e kolleita no la presija muda sistema oras ne’e ba agrikultura konvensional. Atu atinji ne’e, presija estudu komprensivu kona ba fatores lolos sira ne’ebé afeita kuantidade kolleita iha Timor-Leste oras ne’e. Estudu ne’e ne’e tenki inklui investigasaun kona ba frakeza no forsa iha sistema tradisional nian, mudansa klimatika nia efeitu, jestaun rai no bee, jestaun kuda no kolleita, kontrolu ba duut fuik, peste no moras sira, no mos plantas nia espêcies no variedade. Rezultadu peskiza ne’e tenki sai baze ba implementasaun real iha kampu hodi hatudu katak sistema organiku iha eskala ki’ik bele fo kolleita ne’ebe a’as.

Dezafiu seluk mak merkadu domestiku ba produtu lokal. Bainhira laiha limitasaun ba importasaun produtu ai-han mai Timor-Leste, sei susar ba produtu orgániku lokal atu kompete iha merkadu domestiku tanba diferensa iha folin. Maibé se governu limita importasaun ba produtu ne’ebé bele produz iha rai laran, ne’e se sai hanesan motivasaun atu agrikultór sira produs barak liu tan. Dezafiu importante seluk maka falta de industria ne’ebé forte ba produtu agrikultura nian iha rai laran. Kondisaun ne’e halo Timor-Leste labele hetan hetan benefisiu másimu husi produtu organiku lokal, en termus de hetan folin diak liu iha merkadu no mos kriasaun fatin servisu nian.

 

Konkluzaun

Agrikultura orgániku eskala ki’ik mak alternativa ida ba agrikultura konvensional ne’ebé oras ne’e domina mundu. Sistema ne’ebé bele benifisia Timor-Leste nia agrikultór sira bainhira dezenvolve ho didiak. Sistema adopta ona iha mundu tomak tanba nia benefisiu ba rai no ba meiuambiente en jeral, no mos konsidera hanesan sistema ne’ebé produz ai-han ho kualidade saude diak liu. Benefisiu sira ne’e halo rai agrikultura orgániku nia aumenta luan ba bebeik husi tinan ba tinan. Merkadu ba produtu orgániku nian mos aumenta bo’ot ba bebeik. Sistema ne’e sei benefisia Timor-Leste liu husi hasa’e kolleita ho dalan ne’ebé sustentavel, uju rai agrikultura nian ho efisiente liu, asesu ne’ebé fasil liu ba merkadu internasional, no sai hanesan identidade uniku ida ne’ebé bele dada ema barak mai vizita Timor-Leste no haforsa liu tan turismu komunitaria ne’ebé bele oferese fonte rendimentu ida tan ba komunidade. Sistema ne’e mos diak liu iha kontextu mudansa klimatika nian no livre husi korporasaun bioteknologia sira nia influensia. Dezafiu ba apoiantes agrikultór orgániku sira iha Timor-Leste mak oinsa konvense agrikultór sira no governu katak sistema ne’e mak diak liu ba Timor-Leste tanba sein sira nia suporta, sistema ne’e susar atu realiza. Limitasaun ba importasaun produtu ne’ebé bele produz iha rai laran importante atu fo motivasaun liu tan ba agrikultor sira, no atu hetan benefisiu másimu husi produtu agrikola, Timor-Leste presija iha nia industria rasik ba produtu agrikultura sira.

Hakerek-nain: Maximus Tahu, estuda Produsaun Plantas no Industria Primaria iha University of New England, NSW, Australia

REFERENSIA

 Beeton, S. (2006). Community Development Through Tourism. Victoria, Australia: Landlink Press .

Fageria, N.K. (1992). Maximizing Crops Yield. New York, US: Marcel Dekker, Inc.

Ferreira, M., Martins, I., Hawkes, S., & Tahu, M. (2011). Valuing Farmers’ Words and Wisdom, A report on the Consultation with Farmers. Lao Hamutuk, Dili, Timor-Leste.

FiBL and IFOAM. (2014). The world of organic agriculture – statistics and emerging trends 2014. Retrieved from: https://www.fibl.org/fileadmin/documents/shop/1636-organic-world-2014.pdf

Food and Agriculture Organization (FAO). (n.d). Organic Agriculture FAQ. Retrieved from http://www.fao.org/organicag/oa-faq/oa-faq5/en/

Food and Agriculture Organization (FAO). (n.d). Country profile: Timor-Leste. Retrieved from http://www.fao.org/countryprofiles/index/en/?iso3=TLS

Halwell, B. (2006). Can Organic Farming Feed Us All? World Watch Magazine 19, (3). Retrieved from http://www.worldwatch.org/node/4060

Hooper, S., Martin, P., Love, G., & Fisher, B.S. (2002). Farm Size and Productivity: where are we? Australian Commodities 9 (3), pp. 495-500. Retrieved from http://143.188.17.20/data/warehouse/pe_abarebrs99000851/PC12415.pdf

International Trade Centre UNCTAD/WTO and FiBL. (2007). Organic Farming and Climate Change. Retrieved from

https://www.fibl.org/fileadmin/documents/shop/1500-climate-change.pdf

Lockeretz, W. (2007). What Explains the Rise of Organic Farming? In W. Lockeretz (Ed.), Organic Farming: An International History, (pp. 1-8). Townbridge, England: Cromwell Press.

MacDonald, J.M. (2011). Why Are Farms Getting Larger? The case of the U.S. Prepared for the Annual Meeting of German Association of Agricultural Economists, Halle, Germany. Retrieved from http://ageconsearch.umn.edu/bitstream/115361/2/MacDonald.pdf

Markets and Markets (n.d). Summary of Global Organic Foods and Bavarages Market Analysis by Products, Geography, Regulations, Pricing Trends, and Forecasts (2010-2015). Retrieved from http://www.marketsandmarkets.com/Market-Reports/organic-foods-350.html

Oxfam Australia. (2008). Timor-Leste Food Security Baseline Survey Report (2008). Retrieved from http://aid.dfat.gov.au/Publications/Pages/1846_4633_4149_4480_7444.aspx

Organic Trade Association. (2011). OTA 2011 Organic Industry Survey. Retrieved from http://www.ota.com/organic/mt/business.html

Scow K, Somasco O, Gunapala N, Lau S, Venette R, Ferris H, Miller R, Shennan C. 1994. Transition from conventional to low-input agriculture changes soil fertility and biology. Calif Agr 48(5):20-26. DOI: 10.3733/ca.v048n05p20

Seed of Life. (2010). Predicted Change to Rainfall and Temperature in Timor-Leste due to Climate Change and its Impact on Agriculture. Ministry of Agriculture and Fisheries, Dili, Timor-Leste.

T. N. Carver. 1991. Large-scale and Small-Scale Farming, Publications of the American Statistical Association, Vol. 12, No. 93 (Mar., 1911), pp. 488-489. Published by: American Statistical Association, Article DOI: 10.2307/2965130

Thompson, S.J. (2011). Geology and Soils in Timor-Leste. Retrieved from http://seedsoflifetimor.org/wp-content/uploads/2013/01/Geology-and-Soils-in-Timor-LesteA4.pdf

United Nations Conference on Trade and Development, UNCTAD. (2013). Trade and Environment Review 2013, Wake Up Before It is Too Late. Retrieved from http://unctad.org/en/PublicationsLibrary/ditcted2012d3_en.pdf

 Vogt, G. (2007). The Origins of Organic Farming. In W. Lockeretz (Ed.), Organic Farming: An International History, (pp. 9-29). Townbridge, England: Cromwell Press.

 

Advertisements