Tags

, , , , , , ,

Benefísiu g7+ ba Timor-Leste

Helder da Costa, PhD

Sekretariu Jeral g7+

Introdusaun

Maske foin restaura nia independensia iha tinan 13 nia laran, Timor-Leste nia prezensa no lideransa iha nivel global hetan ona rekonesimentu boot tebes husi komunidade internasional sira. Iha nivel nasional, Timor-Leste mak lidera grupu g7+ (nasaun frajil no pos-konflitu nebe hamutuk 20) husi 2010-2014. TL nia lideransa neé hetan mos apoiu masimu husi Presidente RDTL, Parlamentu Nasional, Primeiru Ministru, Governu no komponente Sosiedade Sivil hanesan kauza nasional ida.
Durante tinan 13 nia laran, prosesu ba harii dame no harii estadu (peacebuilding and statebuilding) iha Timor-Leste rasik hasoru desafiu oin-oin, maibe ita nia vontade hakarak fahe experiensia ba nasaun frájil sira boot tebes. Ohin loron Timor oan sira sente orgulho moris hakmatek no determinadu iha sira nia soberania. Timor oan sira agora moris iha ambiente trankuilidade nia laran. Ita nia ambiente seguransa neébe hakmatek, nakonu ho optimismu no konfiansa hodi hakat ba future. Ida konsidera nudar pasu boot ida hodi hakat ba prosesu dezenvolvimentu sosial, ekonomia no politika iha Timor-Leste.
Tempu to’o ona atu Timor-Leste hare ba oin ho Planu Estratéjiku Dezenvolvimentu (PED) hodi trasa nia polítika dezenvolvimentu ida apropriadu hodi garante paz, fornese uma, be moos, saneamentu, aihan ba Timor oan tomak.
Timor-Leste (nudar eis-xefe ka Prezidente g7+ nian ba nasaun ruanulu) agora sai hanesan Uma Nain (host country) ba g7+ tuir Komunikadu Lome iha fulan Maiu 2014) no Resolusaun Konseilu Ministru Timor-Leste iha loron 19 Dezembru 2014, disidi Dili sai nudar Kuartel Jeral ba Sekretariadu g7+. Mekanismu ida neé identiku/hanesan mós Indonesia sai Uma Nain ba Sekretariadu ASEAN iha Jakarta, no Fiji mak Uma Nain ba Sekretariadu Pacific Islands Forum (PIF) iha Suva. Republika Sierra Leone mak agora assume kargu hanesan Xefe ka Prezidente g7+ nian nebe serve Estadu Membru hamutuk nasaun 20: Afghanistan, Burundi, Republika Sentral Afrikana, Chad, Comoros, Cote dÍvoire, Republika Demokratika Congo, Guine, Gunie-Bissau, Haiti, Liberia, Papua New Guinea, Sao Tome e Principe, Sierra Leone , Solomon Islands, Somalia, Sudan do Sul, Timor-Leste, Togo no Yemen.

Oinsa g7+ Estabelese?

Sadere metin ba Voluntarismu, Solidaridade no Kooperasaun nudar prinsipiu fukun, konsege fanu nasaun 40 resin mak mai partisipa iha konferensia bot ida iha Dili, ne’ebe halao iha fulan Abril 2010. Representante sira husi nasaun frájil sira hanesan Burundi, Chad, Republika Afrika Sentral, Republika Demokratika Kongo, Liberia, Sudan do Sul, Sierra Leone, Solomon Islands, no Timor-Leste rasik nudar uma nain, hatudu sira nia seriedade no kompromisu bot hodi ofisialmente forma grupu g7+. Konferensia ne’e mos konsidera nudar momentum tranzisaun importante ida ba Timor-Leste, tanba antes tinan 2010, Republika Demokratika Kongo mak lidera grupu serbisu kona ba nasaun frajil sira, maibe iha konferensia Dili, kargu ne’e mos entrega kedas ba Timor-Leste, no Ministra Finansas, Emilia Pires, mak lidera grupu g7+ to’o fulan Maio 2014.
Iha biban Konferensia Dili ne’e, estabelesementu g7+ hamosu mos dokumentu istóriku ida hanaran Deklarasaun Dili (Dili Declaration). Deklarasaun ne’e bolu atensaun maka’as ba espiritu solidaridade entre nasaun frajil sira, no marka komitmentu hodi serbisu hamutuk (koletivu) iha g7+ nia laran hodi fahe experiensia, dezafiu, susesu no failansu sira ne’ebe iha no hasoru, hodi nune’e nasaun g7+ sira bele hakat sai lalais husi faze frajilidade ba faze resiliensia. Tan ba ne’e nasaun membru g7+ sira presiza hasoru malu bebeik hodi diskuti kona ba area importante 4: (i) Governasaun (ii) Dezenvolvimentu Ekonomiku (foku ba rekursus naturais, hamenus kiak-mukit, kriasaun oportunidade ba kampu serbisu), (iii) Dezenvolvimentu umanu no sosial, no ikus liu (iv) area siguransa (foku iha resolusaun konflitu, rekonsiliasaun, inklusaun sosial, dialog kona-ba hari’i dame no ordem siguransa. Nasaun sira ne’e kompremetidu tebes atu hasoru malu bebeik ho apoiu husi komunidade internasional sira.
Baseia ba konferensia Dili, sorumutu Ministerial g7+ nian hahu halao ona kada tinan no tuir rotasaun ba nasaun sira ne’ebe mak pronto hakarak sai uma nain. Hahu husi Juba, Sudaun du Sul, sai uma nain dahuluk ba Sorumutu Ministerial Grupu g7+ nian iha fulan Otubru 2011; tuir fali Port Au Prince, Haiti iha fulan Novembru 2012; no Lome, Togo iha tinan 2014. Reuniaun ikus iha Togo ne’e, hamosu Deklarasaun Lome, ne’ebe ho unanimidade adopta Karta g7+ (g7+ Charter), Primeiru Ministru Timor-Leste, Sua Excelencia Kay Rala Xanana Gusmão, nomeiadu nudar Eminent Person & Consultative Council Member ba Grupu g7+, iha biban hanesan Excelensia Sra. Emilia Pires (Eis-Presidente ba Grupu g7+) mos hetan fiar nudar Enviadu Spesial (Special Envoy) ba Grupu g7+ nian. Laos ne’e deit, maibe Dili mos hili sai nudar Sekretariadu permanente (Kuartel Jeral) ba Grupu g7+ nian. No Ministru Finansas Sierra Leone nian, Excelencia Dr. Kaifala Marah, sai nudar Presidente foun ba Grupu g7+ durante tinan rua (agora dadauk).

Tanba sá mak Timor-Leste hetan fiar husi nasaun seluk hodi lidera Grupu g7+, no benefisiu saida mak Timor-Leste sei hetan?

Atu responde ba pergunta ida ne’e, hakerek nain hakarak fo nia observasaun badak ida kona-ba konjuntura politika dezenvolvimentu global relasiona ho asistensia externa sira ne’ebe ezisti, no valores internasionais sira ne’ebe mak ema hanaran kontratu sosial internasional nian (international social contract), hafoin koalia kona ba benefisiu husi g7+ ba Timor-Leste.
Atualmente doadores internasional barak laos fo sira nia asistensia umanitariu deit, maibe sira mos hafalun metin ho sira nia interese sosial, no ekonomia liu husi sira nia exportasaun, no determinasaun politika, ekonomika ka persuasaun politika (political persuasion) ruma ba nasaun resipientes (nasaun sira ne’ebe mak simu tulun). Jeralmente, asistensia externa sira ne’e hahu tiha ona molok Segundu Gerra Mundial (II World War) remata. Iha 1944, Bretton Woods forma IBRD (pioneiru husi Banku Mundial), no mos FMI-Fundu Monetariu Internasional (International Monetary Fund-IMF).
Iha 1948, asistensia bilateral Estadus Unidus Amerikanu (USA) hahu ho estabelesimentu Administrasaun Kopersaun Ekonomia (Economic Cooperation Administration) ka ema bolu Marshall Plan, planu ida ne’ebe hodi tulun rekonstrue fali Europa Osidental husi influensia politika komunismu Europa Oriental nian. Iha dekade 1960, programa asistensia externa Europa nian dezenvolve makas no iha pozisaun ida atu fo asistensia desenvolvimentu ba nasaun sira, liliu iha kontinente Afrika no Asia nian. Wainhira prosesu dekolonizasaun iha Afrika no Asia avansa dadaun, França ho Reinu Unidu mos lansa dadauk sira nia programa boot kona-ba asistensia ba sira nia eis-kolonia sira. Maibe, asistensia hira ne’e ema uza sala ba interese seluk, hanesan sosa ekipamentu militare, no seluk-seluk tan. Iha area sira dezenvolvimentu nian liuliu kona ba hamenus kiak, konseitu kresimentu 6% nesesita atu bele garante nasaun sub dezenvolvidu sira hodi kombate kiak. Atu atinji nivel kresimentu ida ne’e, sira apela 0.7 pursentu GNP (Gross National Product) ou Produtu Nasional Brutu (PNB) husi nasaun desenvolvidu. Entaun iha meta ida ne’e, iha nasaun lima deit mak konsege alkansa, hanesan: Dinamarka, Holanda, Suesia, Noruega no Luxemburgo, no hahu iha prinsipu dekade 1980, nivel asistensia komesa tun husi 0.36 husi PNB ba 0.22 pursentu PNB.
Iha dekade 1990, ema barak bolu atensaun makas ba koordenasaun asistensia nebe efikaz liu. Estudu ida halu husi Banku Mundial (1993) konklui katak ownership husi govenru, administrasaun nebe forte, no kapasidade institutional, no politika no jestaun ba setor publiku, kordenasaun nebe diak husi diadores sira atu hadiak sira nia pratika bisnis sai hanesan konkluzaun importantes ba review nebe sira halu. Tanba ne’e hahu iha Roma, Italia, tinan 2003 hala’o Forum dahuluk kona ba asistensia externa, tuir kedas ho sorumutu daruak iha Paris, França, iha tinan 2005 hamosu Deklarasaun Paris ne’ebe foka liu ba prinsipiu lima hanesan; nain rasik (ownership); alinhamentu (alignment); jere rezultadu (managing for results) no responsibilidade mutual (mutual accountability). Tuir fali mai iha Accra, Ghana, iha tinan 2008 mak hanesan forum ba datoluk, ne’ebe hasai Agenda Accra nian ba Asaun (Agenda for Action-AAA) ne’ebe fo mahon atu hamosu konseitu hari’i dame no hari’i estadu (peacebuilding no statebuilding). Forum Busan, iha Korea Du Sul, iha tinan 2011 mak hanesan sorumutu ba dahat nian, iha momentu ida ne’e nasaun barak, inklui Timor-Leste hola parte hodi aseita Akordu Foun (New Deal) ne’ebe fo importansia ba nasaun frajil sira iha sumbrina Grupu g7+ atu determina rasik sira nia lideransa liu husi sira nia metodu aprosimasaun iha nivel nasional.

Tuir mai mak faktu hirak ne’ebe sai motivasaun ba hamosu Akordu Foun entre nasaun frajil ho
parseiru siara ba dezenvolvimntu nian:
• Ema hamutuk 1.5 biliaun maka agora dadauk moris iha nasaun ne’ebe afetadu husi konflitu no frajil;
• Nasaun frajil no pos-konflitu faila atu alkansa Objetivu Dezenvolvimentu Milenium (ODM) ka MDG’s;
• Kuaze menus husi 70 % nasaun hirak ne’ebe frajil hare no hatene rasik ona konflitu, hahu husi tinan 1989;
• Atu bele halo transformasaun governasaun basiku, sei presiza tinan 20-40 atu realiza.
• 30 % husi Asistensia Ofisial ba Dezenvolvimentu (Overseas Development Assistance-ODA) gasta iha kontestu ne’ebe frajil no hetan impaktu makas husi konflitu;
• Maneira serbisu iha nasaun hirak ne’ebe frajil presiza tebes atu hadiak;
• Iha pratika dala barak parseiru ba dezenvolvimentu sira hakat liu tiha interese nasional no ator nasional sira. Tan ne’e presiza lideransa no aprosimasaun nasional husi nasaun frajil sira iha Akordu Foun (New Deal) ne’ebe lidera husi g7+. Akordu ne’e mosu nudar padraun no modalidade hodi dialogu ho parseiru ba dezenvolvimentu sira.

Benefisiu ba Timor-Leste nia lideransa iha Grupu g7+ mak tuir mai ne’e:

• Hakarak sai lalais husi faze frajilidade hodi hakat ho fiar an ba iha faze dezenvolvimentu (duni tuir nasaun sira nebe iha rendimentu as);
• Maske jeografikamente Timor-Leste nasaun ki’ik ida, maibe nia lideransa liu husi Primeiru Ministru Sua. Excelensia Kay Rala Xanana Gusmão, Ministra Finansas Excelencia Emilia Pires, no suporta husi Sekretariadu g7+ nebe base iha Dili durante tinan 4 (2010-2014), konsege halibur nasaun frajil sira hodi sai forsa determinante ida iha for a global, liliu iha komunidade komunidade internasional sira nia oin.
• “Nada Sobre Nos Sem Nós” (“Nothing About Us Without Us”), ne’e mak lia fuan inspiradu tebes ba membru Grupu g7+ hodi fiar an hakat ba oin ho asaun koletivu ida forte. Iha interpretasaun ida simples, lia fuan ne’e hakarak alina Grupu g7+ nia ezizensia forte parseiru desenvolvimentu, no autor global sira katak: sei la iha resultadu buat ida, wainhira imi la involve ami iha laran. Liliu iha prosesu ba debates interesse
• desenzovilmentu ba nasaun frajil no pos-konflitu sira.
• Timor-Leste nia lideransa, kredibilidade, integridade rekuinesementu husi nasaun bot sira, no agensia internasional sira sai ona hanesan “marka” ka “brand” ida ne’ebe halo ema respeitu no reseiu.
• Timor-Leste fahe ona nia esperiensia sira oinsa atu jere jestaun rekursus naturais, jestaun finansas publika, reforma seguransa ne’ebe sai hanesan referensia ba istória susesu (success story).
• Atu ezekuta programas g7+ nian, iha kolaborasaun boot entre g7+ ho Ministériu Negosiu Estranjeiru (MNEC) Timor-Leste nian. Ulun boot MNEC sempre partisipa iha sorumutu g7+ nian iha rai seluk.

New Deal/Akordu Foun

Akordu Foun ka New Deal ne’ebe lansa iha Busan, Korea du Sul iha fulan Dezembru 2011, fo tensaun liu ba assistensia dezenvolvimentu sira ba estadu frajil no pos-konflitu sira. Akordu foun hanesan arkitektura dahuluk ba asistensia esterna iha historia nasaun sira ne’ebe afetadu husi konflitus. Akordu Foun temi ne’e inklui pilar tolu iha akronim tuir mai: PSG (Peacebuilding and Statebuilding); FOCUS no TRUST, bele hare’e iha diagram tuir mai:

PSG

Fonte: New Deal for Engagement in Fragile States, Sekretariadu g7+ (2014)

Akordu Foun hanesan mekanismu foun ida ne’ebe foka liu ba planemaneto ne’ebe lidera husi nasaun frajil sira rasik no tuir ida-ida nia kontestu ne’ebe involve liu poder lokal, rejional no nasional, parseiru ba dezenvolvimentu sira, sosiedade sivil no setor privadu. Progresu ne’ebe hahu mosu iha Timor-Leste liliu implementasaun New Deal nian mak tuir mai ne’e:
• Doador sira komesa alina ba Planu Esttratejiku Deznvolvimentu (PED) tuir prinsipiu Akordu Foun (New Deal);
• Programa Ajensia Nasoesn Unidas sira nian iha Timor-Leste sei koresponde ho objetivu oin lima iha PSG nian, ezemplu hanesan: Australia nia inisiativu ba utiliza sistema governu Timor-Leste (country system) hodi serbisu hamutuk ho Ministeriu Finansas.
• Uniaun Europeia mos hahu tuir ona uza sistema ida hanesan; Doador sira hahu uza Sistema Informasaun ba Jestaun Ajudus (Aid Information Management System-AIMS) nebe dezenvolve husi Unidade ba Jestaun Parseirus Dezenvolvimentu-DPMU nian iha Ministeriu Finansas hodi produs Livru Numeru 5 ba Orsamentu Jeral Estadu Timor-Leste nian;
• Lideransa hosi lina Ministeriu sira hahu forte ona.


Perspektiva g7+ nian kona ba Ajenda Dezenvolvimentu pos-2015

MDG (Millenium Development Goals) nebe atu expira ona iha fim de 2015 kobre deit objetivu desenvolvimentu 8 nebe limitadu. Iha dekade liu ba, mundu tomak hamosu konsensu ida katak visaun global ba dezenvolvimentu 2015-2030 presija tebes.
Iha Fevereiru 2012 Nasoens Unidas kria Painel Altu Nivel (High Leve Panel, HLP) nebe kompostu husi ema eminentes iha mundu hamutuk nain 26 nebe lidera husi Eis- Presidente Indonesia SBY, PM Reinu Unidu David Cameroon no Prezidente Liberia, Ellen Johnson Sirleaf hodi halu konsulta ho komunidades iha mundu tomak. Ministra Finansas Timor-Leste, Emilia
Pires mos hola parte iha Painel Altu Nivel neé. HLP nia relatóriu nebe submete ba SJ ONU Ban Ki Moon iha Maiu 2013 sai hanesan referensia ida ba Objectivu Dezenvolvimentu Sustentavel (Sustainable Development Goal) ba 2015-2030.
Timor-Leste ho nia papel importante konsege halibur nasaun 45 iha Fevereiru 2013 husi Asia, Pasifik, Afrika, Europa ho EUA hodi hamosu dokumentu importante ida ho naran Dili Consensus (Konsensu Dili) nebe sai hanesan referensia boot ba debates iha nivel internasional kona ba Ajenda Dezenvolvimentu Pos-2015.
Iha Nova Yorke, Grupu de Trabalho Abertu (Open Working Group, OWG) nebe kompostu husi nasoens besik atus ida resin halu sira nia servisu no hatoo ona Relatoriu ba SJ ONU Ban Ki Moon. Iha relatoriu ne, sira deskreve 17 Metas no 169 Alvo (Targets) para bele halu debate iha Assembleia Jeral Nações Unidas iha Setembru 2014.
Grupu g7+ fiar katak: “Laiha Paz Sei Laiha Dezenvolvimento; no Laiha Dezenvolvimentu bele Laiha Paz” (“there can be no peace without development and there can be no development without peace). Tanba neé, iha sorumutu paralelu ida (g7+ side event) iha Nova Yorke iha 22 Setembru 2014 (PM Xanana Gusmão mos hola parte hanesan key note speaker), g7+ tenta atu influensia ONU para iha objetivu ida (Goal # 16) – Building Peaceful Societies and Effective Institutions (harii sosiedade nebe moris iha dame no hametin institusaun nebe efikas) sai hanesan objetivu prinsipal ida ba Ajenda Dezenvolvimentu Pos-2015 nian atu bele lori mudansas/ progresu. Tuir g7+ nia perspektiva, se objetivu # 16 mak la inklui iha Agenda Dezenvolvimentu Pos-2015, paízes frájeis sira sei enfrenta dezafius boot iha tinan sanulu resin lima tuir mai, katak sira sei hela iha kotuk (left behind) dala ida tan.
Sekretáriu Jeral Nasoens Unidas, Ban Ki Moon emiti tiha ona Relatóriu Synthesis ida iha Dezembru 2014 ho títulu: ”The Road to Dignity by 2030: Ending Poverty, Tansforming All Lives and Protecting the Planet” (Dalan ba Dignidade toó 2030: Hakotu Mukit, Transforma Moris Hotu no Proteje Planeta). Nuneé, Nasoens Unidas mós sei presija identifika indicadores aplikáveis nebe bele akolha, kompara no analiza. Iha tinan ida ne’e negosiasoens sei hala’o iha Nova Yorke atu desidi kona ba metas no objetivus Desenvolvimentu Sustentável (Sustainable Development Goals) husi 2015 ba 2030. Timor-Leste liu husi nia Misaun Permanente iha Nova Yorke, liu-liu Embaixadora Sofia Borges ho nia konsistensia defende makas Goal # 16 ho Estadu Membrus g7+ sira seluk , inklui lideransa Sierra Leone (hanesan Prezidente g7+ nian) atu bele asegura Objetivu ida neé tama iha ajenda Dezenvolvimentu ba Pos-2015.

Kooperasaun Frájil ba Frájil (F ba F)

Ho motto “ Nada Sobre Nós Sem Nós (Nothing about Us Without Us) , g7+ komesa promove konseitu ida ho naran Kooperasaun husi Estadu Frajil ida ba Estadu Frajil sira seluk. Ohin loron ema seluk iha mundo koalia kona ba Kooperasaun Sul ba Sul nebe refere liu ba nasoens sira iha emisferiu sul (kooperasaun entre paízes em vias de desenvolvimento no sub-desenvolvido), g7+ fiar katak ho Kooperasaun F ba F sei lori benefísiu boot ba nia membrus sira iha áreas tolu: (1) Jestaun rekursu naturais, (2) Jestaun finansas públika no (3) Rekonsiliasaun.
Iha prátika, area rekonsiliasaun nian, pur ezemplu, Timor-Leste nia asistensia ba Guine-Bissau, paíz irmaun ida nebe konesidu frájil tanba konflitu akontese tinan-tinan iha impaktu boot tebes. Liu husi asistensia teknika TL nian iha prosesu rejistu eleitoral nebe lidera husi Sekretariu Estadu Desentralizasaun Tomas Cabral nian, konsege ajuda no lori Guine-Bissau ba dalan loos. Guine-Bissau bele hala’o eleisaun prezidensial no legislativa iha tinan kotuk (2014) ho susesu boot, eleisaun jeral nebe rekonesidu internasionalmente hanesan fair no transparante. Oras ne’e Guine-Bissau hahú sira nia prosesu Peacebuilding no Statebuilding. Nuneé nasaun Guine-Bissau apresia tebes Estadu Timor-Leste nia ajuda iha momentu difísil wainhira komunidade internasional sira tomak fo sansaun ba Guine-Bissau tanba iha kudeta iha Abril 2012.
Iha kontesktu jestaun de rekursu naturais, nasaun Sudaun do Sul nebe foin hetan independensia tinan 4 liu ba, interessadu tebes atu aprende husi Timor-Leste nia experiensia oinsa jere Fundu Petrolíferu tanba Sudan du Sul nia orsamentu Jeral Estadu depende totalmente ba minarai (primeira nasaun ke depende totalmente ba minirai, segundu lugar mak Timor-Leste) iha mundu.
Molok tinan 2014 ramata, Governu Timor-Leste dala ida tan hatudu nia maturidade polítika no solidaridade umana hodi ajuda USD Milaun 2 ba Repúblika Sierra Leone, Guine no Liberia (paízes tolu) nebe enfrentra moras Ebola. Ajuda Timor-Leste nian neé hanesan jestu de solidariedade husi membru g7+ ida ba membru g7+ seluk iha kontekstu F ba F tuir prinsipiu Akordu Foun (New Deal) katak uza sistema paiz nian (use of country system). Sekretariadu g7+ sai hanesan ponte hodi fasilita ajuda umanitáriu husi Governu Timor-Leste ba membrus g7+ sira seluk.
Felizmente, Timor-Leste nia jestu de solidariedade ne’e hetan rekonesimentu husi Presidente Barack Obama nia konseleiru iha White House (Uma Mutin) iha Outubro 2014, nebe apresia Timor-Leste nian esforsu tu ajuda paízes sira nebe enfrenta moras Ebola. Nune’e Timor-Leste sai hanesan úniku País kiik oan ida mak hakarak ajuda rai sira nebe enfrenta dezafius barak entre rai boot sira seluk hanesan, USA, Reinu Unidu, Swedia, Kuwait no Australia.

Konkluzaun

Ho observasaun badak ida neé, ita bele hatete katak iha implikasaun positivu tebes ba Timor-Leste, katak ho orgulho boot, maski Timor-Leste hanesan paíz ida nebe kiik jeografikamente, bele mos influensia mundu nia polítika (shape global policies). Kompromisu boot husi Estadu Timor-Leste ba g7+ kona ba harii Dame no harii Estadu (peacebuilding and statebuilding) sai hanesan instrumentu polítika negósiu estranjeiiru (foreign policy) hodi bele hametin diplomasia no tulun nasaun frájil sira atu sai husi frajilidade no hakat ba resiliensia. Iha bele mos rejista katak :
1. Rekursus finanseirus ho montante USD Milaun 2,5 (aprovadu husi Parlamentu Nasional iha tinan 2014 no 2015 respektivamente ba g7+) atu implementa New Deal no hala’o programa g7+ nian hetan apresiasaun boot husi Membrus g7+ sira.
2. Timor-Leste nian reputasaun internasional nebe rekonesidu ona obriga ita Timor oan atu mantein nafatin paz, estabilidade no seguransa iha rai laran hodi bele hala’o dezenvolvimentu nebe prósperu ba Timor oan tomak.
3. Maske ho dezafius no obstákulus barak, rekursu limitadu, Timor-Leste nia diplomasia no advokasia iha nivel internasional liu husi nia papel iha g7+ konsege hamorin Timor-Leste nia naran iha nivel global.

Ikus mai, embora Governu Timor-Leste preokupa tebes ho dezafius dezenvolvimentu iha rai-laran liu husi alokasaun Orsamentu Jeral Estadu tinan-tinan ba Linhas Ministeriais no Ajensias Autónomas, maibe Timor-Leste mos la taka matan hodi fo tulun nafatin ba rai seluk, inklui g7+
liu husi transferensia públika (ajuda umanitária) hodi onra prinsípiu voluntarismu, solidariedade no kooperasaun hanesan membru komunidade internasional.

***

Artigu neé publika ona iha Jornal Diaria UNTL nian, iha loron Kinta, 15 no Sexta, 16 de Janeiru 2015. Ami hetan lisensa hosi autor atu publika fila fai iha Blog ida neé.

Advertisements