IMG_7009

Iha loron Terca, 10 Marsu 2015 Prezidencia Republika liu husi Departementu Analisa no Peskija halao seminar ida ho tema: Governansaun Lokal: Esperiencia no pratika sira diak husi Estadu Unidus Amerika (EUA) no Timor-Leste. Orador nain tolu iha seminar ne’e mak hanesan Sr. Miguel Pereira de Carvalho, Director General ba Desenvolvementu Lokal, Ministeriu Administrasaun Interna, Sr. Mike Davis, City Administrator & Director of Community Development, City of Middleton, Wisconsin no Sr. Radford L. Thomas, Director of Public Utilities, City of Lenoir, North Carolina. Seminar loron sorin ne’e modera husi Sr. Hugo Fernandes husi Asia Foundation no hetan partisipante ho total liu ema nain 80 husi membru Governu, Prezidencia Republika, akademiku sira no sosiedade sivil ne’ebe servisu iha area governansaun lokal iha Timor-Leste.

Iha seminar ne’e Sr. Miguel Pereira de Carvalho nia apresentasaun foka ba prosesu desentralizasaun iha Timor-Leste no desenvolmentu lokal desde 2004. Orador nain rua seluk husi EUA mos koalia kona ba sira nia sistema governasaun lokal iha ne’eba. Sr. Mike Davis nia apresentasaun ho titulu “Governu Lokal iha Estadu Unidus” no Sr. Radford Thomas nia apresentasaun foka ba asuntu “Governu ho forma Jestor-Konsellu”. Seminar ida ne’e loke husi Adjunto Chefe Casa Civil, Sr. Aniceto Neves. Iha nia diskursu abertura, Sr. Aniceto Neves hateten katak, “mesmu ke Estadu Unidus no Timor-Leste iha diferensia ne’ebe bo’ot tebes, maibe Timor-Leste hanesan nasaun foun ida iha oportunidade atu nauk matenek, esperiensia no pratika diak sira husi rai establisidu sira hanesan Estadu Unidus, liuliu tamba Timor-Leste agora dadaun iha hela prosesu desentralizasaun nia laran ka prosesu atu hari’i ninia governu sira lokal”. Sra. Elena Seong, Public Affairs Officer Interinu nudar representante husi Embaixada Estadu Unidus iha Dili iha ninia diskursu hateten katak, “Governu Timor-Leste ne’ebe komesa dadaun ona desentraliza ninia administrasaun atu bele fornese servisu publiku diak liu tan ba komunidade sira, esperiensia  husi sidade rua iha Amerika ne’ebe desentraliza loos ona sei vale tebes”.

Seminariu ida ne’e hanesan parte ida husi programa troka visita entre EUA no nasaun 44 sira seluk organiza husi ICMA (International City/County Management) ho fundus husi Governu Estadu Unidus. Iha tinan 2014 grupu Timoroan hamutuk nain 14 ba tiha ona EUA iha fulan Junhu no Outubro hodi aprende no hare rasik kona ba lalaok governasaun lokal iha UEA no Sr. Mike Davis no Sr. Radford Thomas hanesan representante husi UEA mai visita fali Timor-Leste.

IMG_7025

Advertisements