Tags

, , , ,

Estratéjia ba Autosufisiensia foos: Hamenus Importasaun no Hamenus Dependénsia

Maxi Tahu – La’o Hamutuk

 Introdusaun

Timor-Leste presiza importa foos barak tinan-tinan hodi responde ba nesesidade rai laran ne’ebé boot liu produsaun doméstiku. Nesesidade ne’e sei aas liu tan iha tinan hirak oin mai tanba kreximentu populasaun. Bainhira laiha kreximentu maka’as tebes iha produsaun rai laran, importasaun sei sai aas liu tan. Governu nia polítika klaru liu kona-ba hamenus importasaun foos maka hasa’e produsaun foos iha rai laran hodi atinje autosufisiensia iha 2020. Artigu ne’e koko haree vantajen no limitasaun husi estratéjia ne’e no fó sujestaun balu atu bele inklui iha governu nia planu kona-ba autosufisiensia foos. Hodi fó imajen jerál, artigu ne’e sei inklui informasaun balun kona-ba produsaun, importasaun no utilizasaun foos iha rai laran oras ne’e.

Demanda, Produsaun no Importasaun

Baze importante atu halo desizaun kona-ba polítika ka planu produsaun no importasaun maka dadus estatístika. Infelizmente too oras ne’e laiha fonte ofisiál ida ne’ebé publika regularmente dadus kompletu kona-ba númeru no valor importasaun foos. Publikasaun regular liu mak Diresaun Nasionál Estatístika nia publikasaun kada fulan kona-ba komérsiu esterno maibé sira la espesífiku kona-ba produtu ida-ida no nia kuantidade. Fontes seluk mak Ministériu Agrikultura no Peska (MAP) no Organizasaun Nasoins Unidas nian ba Ai-han no Agrikultura (FAO). Maibé dadus husi parte sira ne’e dala ruma la hanesan ka la konsistente ba malu (Young 2013; N.N 2014).

Tuir dadus ne’ebé iha, Timor-Leste nia importasaun foos aumenta ba bebeik. Husi tinan 2002 to 2012 Timor-Leste nia média (rata-rata) importasaun maka 18,598 ton (FAOSTAT). Iha tinan 2013 importa maizumenus 18,500 ton, no iha 2014 sa’e ba 221,000 ton (KONSSANTIL 2014). Governu projeta katak ba tinan merkadu 2014/2015 (Abril/Marsu) sei presiza importa foos maizumenus 72,000 ton hodi kompleta nesesidade total 140,000 ton. Organizasaun Nasoins Unidas nian ba Agrikultura no Ai-han (FAO) projeta katak Timor-Leste nia importasaun foos ba tinan merkadu 2014/2015 (Jullu/Juñu) sei sa’e too 130,000 ton. Iha realidade, importasaun foos husi Jullu to Dezembru 2014 deit hamutuk 192,500 ton ona. Iha parte seluk, dadus produsaun nian hatudu katak produsaun rai laran iha tendénsia tempu naruk atu sa’e maski ladún estavel (Figura 1).

Figura 1. Produsaun foos husi tinan 2005-2014 hatudu

iha kreximentu desde tinan 2005, tun maka’as iha 2011 no 2013, no sa’e uitoan iha tinan 2014 (DNAH, MAP).

Maxi's Graphic

Polítika hasa’e produsaun no realidade oras ne’e

Estadu Timor-Leste iha objetivu klaru atu hamenus importasaun foos. Ida ne’e refleta iha Plano Estratégico Desenvolvimento Nacional 2011-2030, autosufisiensia produsaun foos iha tinan 2020. Autosufisiensia ne’e sei hetan liu husi hasa’e natar-irrigado ba 70,000ha, uza hare variedade Nakroma no hasa’e produtividade liu husi sistema ICM no SRI. Parte pozitivu husi planu ne’e maka, liu husi hasa’e produsaun rai laran, bele hamenus importasaun no iha tempu hanesan hasa’e agrikultór sira nia rendimentu husi fa’an foos. Se tuir dadus governu nian, Timor-Leste iha rai poténsia ba produsaun foos maizumenus 70,000, no bainhira area sira ne’e hotu produz ona foos ho produtividade, tuir governu nia tarjetu, >4.5ton/ha, konserteza iha 2020 Timor-Leste bele hetan ona autosufisiensia iha foos, no sei iha tan surplus. Infelizmente, iha realidade objetivu ne’e sei susar atu atinje.

Timor-Leste nia area potensiál ba produsaun foos iha tendénsia longu prazu atu menus ba beibeik (Banku Mundial, iha MAF/FAO Policy Workshop 2013). Dokumentu MAP nian sira mos haktuir tendénsia ne’e. MAP ho AECID nia relatóriu haktuir katak iha tinan 2009 Timor-Leste nia area kultivasaun hare hamutuk 41,791ha. Iha 2014 MAP nia planu iha dokumentu OGE dehan katak atual area kultivasaun iha tinan ne’ebá mak 37,579ha. Tinan ne’e, MAP dehan atual area kultivasaun 26,373ha. Observasaun diretamente iha distritu Maliana ne’ebé halo produsaun foos boot liu iha Timor-Leste hatudu katak area produsaun foos barak mak muda ona nia funsaun. Faktu seluk maka, númeru agrikultór produtor foos menus ba bebeik. Recenseamento populasaun 2004 no 2010 hatudu realidade ne’e, no iha posibilidade boot katak too tinan 2015 ne’e númeru agrikultór sei tun liu tan. Iha recenseamento 2004 uma kain 60,971 dehan katak sira kuda hare, iha fali 2010 númeru ne’e tun ba 45,724, tun 25%.

Tabela tuir mai ne’e haktuir progresu no planu produsaun foos bazeia ba informasaun husi PEDN, livru Orsamentu Geral do Estadu 2015 no Livru Agricultura iha Númeru 2005-2009.

Tabela 1. MAP nia atinjimentu no planu relasiona ho produsaun foos

(Livru OGE Rec. 2015 no PEDN 2011-2030).

Tinan Area Kultivasaun (ha) Mudansa Produtividade (t/ha)
2008 45,635 1.8
2009 41,791 -3,844 3.1
Atual 26,373 -15,418
2015 32,280 +5,907 3.72
2018 50,000 +17,720 5.00
2020 70,000 +20,000 >4.5

Haluan natar too 70,000ha mos sei lori konsekuénsia balun ne’ebé presiza tau matan didi’ak ba. Timor-Leste nia rai serve ba agrikultura 360,000ha, rai ne’ebé soi ba halo natar no toos 150,000ha. Produsaun batar uza rai maizumenus 70,000ha ona (maski tun ba bebeik). Signifika katak hela 80,000ha rai arável. Rai ne’e mak sai tarjetu atu aumenta natar ba 70,000ha. Kestaun ne’ebé presiza konsidera maka, se rai bokur sira ne’e hotu uja ba prodús foos, iha posibilidade boot katak sei sakrifiika mos rai ne’ebé dala ruma sei fó benefísiu liu se uza ba produsaun modo sira, ai-fuan ka hakiak-animal. Peskiza kona-ba rendimentu no gastu umakain nian iha 2011 fó informasaun uitoan ne’ebé bele sai baze ba peskiza kle’an liu tan. Relatóriu ne’e dehan katak uma kain sira hetan rendimentu médio (rata-rata) kada fulan boot liu husi kuda modo, ai-fuan no hakiak animal duké kuda hare. Rendimentu médio kada fulan husi uma kain iha area rural ne’ebé kuda hare mak $7.70, uma kain ne’ebé kuda ai-fuan no modo $22.21 no uma kain ne’ebé hakiak fahi $27.22.

Hanoin balun ba oin

Kombina hasa’e produsaun rai laran ho hamenus konsumu foos

Hasa’e produsaun agrikultura buat ida ne’ebé importante tebes, maibé konsidera progresu ne’ebé iha too oras ne’e no mos dezafiu seluk, hanesan kreximentu populasaun no limitasaun rai agrikultura nian, Timor-Leste presiza iha tan estratéjia seluk atu hamenus importasaun foos. Hasa’e produsaun iha rai laran sei hamenus importasaun maibé importante atu iha mos estratéjia hodi hamenus dependénsia ba foos.

Ba tempu naruk, presiza muda ema nia hanoin no toman kona-ba han. Ida ne’e ho rekoñesimentu katak ema nia toman ba konsumu foos dezenvolve iha periodu naruk nia laran, no presiza tempu naruk mos atu muda. Maibé toman ida ne’e bele muda liu husi edukasaun no kampaña ne’ebé planeado didi’ak no iha kontinuasaun. Oportunidade boot atu halo ida ne’e iha tanba Timor-Leste iha hela prosesu dezenvolve nia kuríkulu edukasaun rasik. Kuríkulu foun ne’ebé foin aprova inklui ona buat balu ne’ebé di’ak tebes atu dezenvolve tan iha etapa tuir mai. Kuríkulu edukasaun sira presiza fó énfaze atu desde kiik labarik sira tenki hetan edukasaun di’ak kona-ba impaktu husi hahán sira ne’ebé sira konsumu, valores nutrisaun, no importánsia husi balansu iha ai-han. Edukasaun sívika tenki kuda espíritu hadomi produtu lokal nudár parte ida husi espíritu nasionalismu nian. Halo estudante sira komprende katak sira nia desizaun kona-ba hahán fó mos impaktu sira nia nasaun nia ekonomia.

Sentraliza planu hasa’e produsaun iha agrikultór sira

Realidade redusaun iha númeru agrikultór no area kolleita foos nian iha tinan hirak ikus ne’e tenki hetan atensaun maka’as. Ba oin presiza avalia fali saida mak polítika sira ne’ebé iha poténsia ka hatudu ona evidénsia katak desmotiva agrikultór sira atu halo produsaun. Polítika importasaun no subsidiu ba foos importadu tenki reavalia ka reorienta fila fali atu koresponde duni ba ninia tarjetu lolos no la hamate foos lokal iha merkadu domestiku. Politika subsidiu ba katuas ferik no veteranus sira presiza reorganiza didiak fali atu labele sai razaun ba ema husik sira nia toos ka natar. Se la’e, investimentu barak hodi sosa trator no harii irigasaun sei sai saugati deit, tanba laiha agrikultor natoon atu aproveita investimentu sira ne’e. Agrikultor, produtor foos rai laran mak tenki sai sentru ba hasa’e produsaun.

Realiza planu fatin rai produtu besik area produsaun

Iha buat tékniku balun se hadi’ak didi’ak bele kontribui ba reduz importasaun foos. Ida ne’e bele en forma de introdusaun teknolojia apropriadu ka kria fasilidade suporta balu atu hasa’e produsaun ka prevene produtu ne’ebé lakon. Ezemplu boot liu mak problema produsaun lakon hafoin de kolleita. Tuir dadus ne’ebé uja iha PEDN, hafoin de kolleita, foos ne’ebé lakon kada tinan hamutuk 25%. Governu nia planu iha PEDN mak atu hatún lakon ne’e liu husi estabelesimentu on-farm grain storage, fatin rai produtu besik fatin produsaun nian. Autor laiha dadus kona-ba fasilidade hanesan ne’e hira mak estabelese ona, maibé enkoraja implementasaun husi planu ne’e. Planu ne’e tenki realiza lalais tanba too tinan ne’e mos lakon pós-kolleita sei sai problema boot. Tuir MAP nia estimatizasaun iha 2014, lakon iha pós-kolleita maizumenus 15-20%. Ne’e reprezenta 10,000-20,000 ton foos kada tinan.

Konkluzaun

Hasa’e produsaun foos iha rai laran sei kontribui ba hamenus importasaun maibé hasa’e produsaun deit la nato’on, no presiza estudu atu garantia katak estratéjia ne’e la sakrifiika rai ne’ebé karik fó sei benefísiu liu ba tempu naruk se uza ba atividade agrikultura seluk. Presiza iha mos estratéjia seluk atu hamenus dependénsia ba han foos liu husi edukasaun kona-ba nutrisaun no mos impaktu konsumu foos ba ekonomia Timor-Leste nian. Planu balu iha PEDN kona-ba harii fatin rai produtu besik area produsaun nian importante atu realiza nune’e bele hamenus lakon pós-kolleita nian ne’ebé oras ne’e entre 15-20%. Presiza mos avalia polítika sira ne’ebé desmotiva agrikultór sira halo produsaun foos ka lakohi halo tan natar, tanba agrikultór sira mak sentru husi produsaun. Asaun hasa’e produsaun no hamenus konsumsaun tenki la’o hamutuk. Hasa’e produsaun bele kontribui ba hamenus importasaun, maibé hamenus dependénsia mak chave ba reduz importasaun.

Referénsia

Buletin Seguransa Ai-han Timor-Leste. Ed. No. 9 Outubru – Dezembru 2014

External Trade Statistics July to December 2014

GIEWS & FAO. Country Brief – Timor-Leste, 29 October 2014 no 22 Abril 2015

FAOSTAT – Timor-Leste http://faostat3.fao.org/browse/FB/BC/E

Informasaun produsaun hare 2014 husi Sr. Amaro Ximenes, Diretor DNAH

MAP & AECID. 2009. Agricultura iha Númeru 2005-2009

National Food Situation, MAF/FAO Food Policy Workshop, 20-21 Novembru 2013

N.N. 2014. Situational Analysis of Agriculture Sector in Timor-Leste

Orçamento Geral do Estado 2014 no Rectificativo 2015

Pagina MAP jornál Independente Ed. 13 Dezembru 2014

Relatóriu Anuál 2014 KONSSANTIL

Timor-Leste Strategic Development Plan 2011-2030, Agriculture – Rice, p. 123

UNFPA,. 2012. A Snapshot of Agriculture in Timor-Leste in 2010

Young, Philip. 2013. The Impact of Rice Import on Rice Production in Timor-Leste. Seed of Life

Advertisements