Tags

cepad

Iha loron 08/10/2015 Grupu Trabaillu Nasional ba Reziliensia (GTN-R) hala’o diskusaun meja redonda iha Prezidensia da Republika ho partisipasaun reprezentantes husi instituisaun governu, sosiadade sivil, Igreija, universidade no F-FDTL.

Objetivu eventu ne’e nian atu halibur hanoin husi partisipantes sira atu haklean liu tan rekomendasaun no asaun saida mak GTN-R propoin nudar asaun atu implementa hodi haforsa elementu reziliensia mak Timor-oan sira iha.

Programa ‘Mekanismu Atu Kompriende Reziliensia’, mosu ho objetivu atu haforsa no hadi’a rekursus ‘reziliensia’ mak eziste iha sosiedade laran, atu nune’e bele kontribui ba hametin paz sustentavel iha Timor-Leste. Hafoin Sentru Estudus ba Dame no Dezenvolvimentu (CEPAD) hala’o tiha konsultasaun ho komunidade sira iha munisipiu 13, CEPAD hetan mandatu husi partisipantes ba Konferensia Validasaun Nasional iha fulan Fevereiru laran liu ba, hodi hari GTN-R atu dezenvolve rekomendasaun no asaun konreta ba  haforsa reziliensia iha Timor-Leste.

Partisipantes sira husi Konferensia Validasaun Nasional iha tempu nebá identifika elementus reziliensia hamutuk hát no ida-ida ho aspetu ida mak sai nudar asuntu no fokus ba GNT-R nia servisu. Elementus hát ne’e mak hanesan kultura – mekanizmu tradisional hodi resolve konflitu ho naun-violensia; lideransa -relasaun entre Estadu no Sidadaun; relijiaun – mensajen ba dame; lei & siguransa – ligasaun entre justisa formal no justisa tradisional.

Membrus GTN-R konkorda katak Lideransa sai hanesan elementu sentral mak  bele liga hamutuk fali Kultura, Relijiaun no Lei no Seguransa ho aspetus nebe’e iha atu nune’e hamutuk bele kontribui ba haforsa reziliensia iha Timor-Leste. Atu ida ne’e sai realidade,  membrus GTN-R fiar katak presiza hamosu vizaun ida mak bele fo esperansa ba Timor-oan hotu. Vizaun ne’e mak Iha Timor-Leste sei iha kondisaun ba hamosu lideransa ho kualidade iha nivel oin-oin, mak  bele hametin relasaun entre sosiedade no estadu baseia ba valores, justisa no fiar malu iha sosiedade laran’’. Atu konkretiza vizaun ne’e iha implementasaun, membrus GTN-R mos hamosu rekomendasaun rua ne’ebe  sira konsideira ideal bainhira tama ba prosesu implementasaun. Rekomendasaun rua ne’e mak, konsolida knar Igreja no relijiaun seluk iha advokasia ba justisa sosial, no ida seluk mak rekuiñesimentu ba valores kulturais no integra valores hirak ne’e iha lei no justisa hodi harmoniza lei formal no tradisional.

Liu husi enkontru iha Prezidensia da Republika, maioria partisipantes konkorda katak hametin relasaun entre estadu no sidadaun importante tebes atu kontribui ba hametin reziliensia iha Timor-Leste. Partisipantes sira suporta hanoin atu harii strutura nasional ida atu habelar liu tan informasaun liu husi edukasaun sivika iha nivel hotu-hotu iha Timor-Leste laran.

Membrus GTN-R sei haklean hanoin husi partisipantes sira molok defini asaun konkreta ruma atu kordena programas no atividade edukasaun sivika husi instituisaun no organizasaun oin-oin ne’ebe dau-daun ne’e hala’o hela atividades edukasaun sivika atu oinsá programa no atividades hirak ne’e bele to’o ba iha area ne’ebe mak seidauk hetan kobertura ho baze iha konteixtu lokal mak defini ona husi rezultadu konsultasaun ho komunidade sira rasik ho fokus iha iha rezilensia.

Advertisements