12787515_1044394098965602_568588568_o

Dili, Palásiu Prezidensiál Nicolau Lobato, Loron 3 fulan-Marsu tinan 2016

Señor Governadór Jerál, Sra. Cosgrove.

Simu Vossa Eselénsia sira iha Dili sai nu’udar onra boot ida ba ha’u no mós ba Isabel, no mós sai nu’udar oportunidade foun ida atu ita komemora hamutuk amizade duradora no estavél entre ita-nia povu no ita-nia nasaun sira.

Ho haksolok boot mak ami hato’o benvindu ba belun ida-ne’ebé hatene di’ak loos kona-ba Timor-Leste no fó nia kontributu sira-ne’ebé desizivu ba pás no ba Timoroan sira-nia seguransa, iha momentu sira krize nasionál nian. Ha’u hato’o benvindu ba delgasaun tomak. Ha’u formula votu sira atu nune’e Ita-Boot sira iha estadia ida-ne’ebé furak iha Dili.

Iha tempu balun liubá ha’u iha prazer atu entrega Kolár Boot Orden Timor-Leste nian, ne’ebé sai nu’udar ami-nia nasaun nia kondekorasaun aas liuhotu ba Señor Governadór-Jerál.

Kolár Boot Orden Timor-Leste nian ne’e reflete ha’u no Timoroan sira-nia sentidu rekoñesimentu ba asaun notável Vossa Eselénsia nian no Ita-Boot nia kontributu pesoál, iha tinan barak nia laran, bodik ba ami-nia rain nia estabilidade no seguransa, no mós rejiaun ida-ne’e nian, no mós aprofundamentu ba amizade no konfiansa entre Timor-Leste no Austrália.

Amizade entre Timoroan no Australianu sira harii liuhosi istória, interkámbiu intensu, no lasu familiar sira-ne’ebé maka’as, entre ita-nia povu sira.

Ita-nia povu sira partilla momentu sira susar no terus boot. Iha Funu Mundiál Daruak, Timoroan sira manifesta solidaridade ne’ebé evidente no abnegada ho Austrália. Ami apoia militár Australianu sira ho ami-nia hakarak no kbiit tomak. Ami-nia povu sofre lakon barak. Timoroan rihun ba rihun nia sakrifísiu kontribui ba Austrália nia defeza no seguransa.

Durante Timoroan nia luta libertasaun, povu Australianu manifesta solidaridade ne’ebé boot, jeneroza no dezinteresada mai ami. Australianu sira simu no konsola refujiadu Timoroan sira rihun ba rihun.

Iha tinan 1999, kapasidade ne’ebé labele esplika hosi militár Australianu sira, liuhosi hosi Vossa Eselénsia nia komandu superior, sai desizivu ba ita-nia objetivu atu estabiliza nasaun ne’e. Ita serbisu hamutuk atu estabelese hikas fali populasaun nia seguransa no salva vida sira. Susesu hosi ita-nia servisu ida-ne’e, no mós hosi Nasoins Unidas nian, konstitui baze ida kona-ba oinsá mak Timoroan sira bele harii demokrasia ida no Estadu Direitu, foin ba dala uluk iha ami-nia istória.

Timor-Leste no Austrália kontinua agora sai aliadu iha objetivu atu bele alkansa nivel aas liután ba dezenvolvimentu sosiál no ekonómiku, hodi hamenus kiak no mukit rabat-rai, iha Timor-Leste no iha rejiaun ne’e.

Ha’u hakarak fó-testamuña ba Ita-Boot, Señor Governadór-Jerál, no mós ba governu Australianu, rekoñesimentu ba apoiu maka’as ba konstrusaun nasionál ne’ebé ami hala’o dadaun.

Kooperasaun entre ita-nia nasaun ne’e luan no produtivu tebes — iha Agrikultura, Edukasaun, Saúde, Seguransa no mós área sira seluk ba ami-nia instituisaun Estadu sira-nia konsolidasaun. Ha’u hakarak mós manifesta ami-nia rekoñesimentu ba foin-sa’e Timoroan sira-nia asesu ba programa servisu temporáriu iha Austrália no hato’o importánsia boot ne’ebé iha, atu komplementa merkadu ba empregu asesivel ba ami-nia foin-sa’e sira no mós dezenvolvimentu ba sira-nia kompeténsia téknika-profisionál.

Interkámbiu kulturál no ekonómiku entre ita-nia povu sira-ne’e sai intensu. Asisténsia Austrália nian ne’e importante no apresia hosi Timoroan sira.

Kooperasaun entre Timor-Leste no Austrália kontribui ba esforsu atu hametin estabilidade no seguransa rejionál sira. Ita hakarak atu kontinua haklean no habelar kooperasaun ida-ne’e, hodi dudu dezenvolvimentu ekonómiku rejionál ida-ne’ebé integradu liután, nu’udar jeradór ba moris-di’ak bodik ba populasaun sira.

Eselénsia.

Demarkasaun ba ita-nia fronteira marítima sira sai nu’udar prioridade nasionál ida ba Timor-Leste. Buat ne’e sai nu’udar asuntu pendent ida iha ámbitu ba relasaun ho Austrália. Solusaun ba kestaun ida-ne’e sei kontribui atu haklean liután ita-nia relasaun ba viziñansa di’ak no amizade no mós atu hametin konfiansa mútua.

Ha’u iha koñesimentu, ho laran-haksolok, kona-ba deklarasaun sira hosi Sua Eselénsia Señor Pimeiru-Ministru Austrália nian kona-ba importánsia atu iha iha rezolusaun pasífika ida ba diferensa sira hotu iha respeitu ba direitu internasionál, inklui UNCLOS, nuudar Konvensaun Nasoins Unidas nian kona-ba Lei Tasi. No mós deklarasaun sira hosi responsável sira hosi Opozisaun iha Parlamentu Austrália nian ne’ebé iha konverjénsia kona-ba importánsia atu hametin orden internasionál ida-ne’ebé bazeia ba Direitu, inklui Konvensaun UNCLOS ne’e.

Ha’u fiar katak ita-nia povu sira, mutuamente, sai solidáriu ba malu iha tinan barak istória nian, ita-nia rai demokrátiku rua, sei hatene buka hetan, liuhosi negosisaun no diálogu, solusaun sira-ne’ebé mutuamente aseitável ho vantajen, hodi fó iha prosesu ida-ne’e, kontributu sira-ne’ebé foun atu hametin estabilidade, konfiansa no lideransa rejionál.

–XX–

Lahó pás no estabilidade, sei laiha dezenvolvimentu. Konviksaun firme ida-ne’e hatudu dalan tiha ona ba ami-nia haka’as-an ba konstrusaun nasionál iha Timor-Leste.

Ami alkansa pás, ami halo rekonsiliasaun, interna no esterna, no ami serbisu namanas hela atu alkansa patamár sira-ne’ebé foun ba dezenvolvimentu ekonómiku no sosiál no mós moris di’ak, hodi halakon kiak no hadi’a ami-nia povu nia kondisaun moris. Pás no estabilidade sai indespensável atu atinji objetu sira-ne’e.

Mundu ne’ebé ita moris hela daudaun ne’e haree ba markadu liután ona hosi imprevizibilidade. Funu no instabilidade—polítika, ekonómika no sosiál—kondisiona situasaun iha rejiaun sira bara-barak. Violasaun kruel no xokante ba direitu báziku sira no ba dignidade umana sai nu’udar realidade loron-loron iha rai bara-barak.

Pelu kontráriu, ita-nia Kontinente no ita-nia rejiaun felizmente sai estável no kontinua atu sai nu’udar motor ba kresimentu mundiál, maske iha redusaun ba taxa espansaun ekonómika, iha tinan hirak sira foin lalais ne’e. Tanba ida-ne’e, dezafiu sira-ne’ebé sériu, kona-ba seguransa sei iha no mós ba dezenvolvimentu. Dezafiu sira-ne’e tenke enfrenta hodi fó-respeitu ba Direitu Internasionál no iha enkuadramentu ba prezervasaun no esforsu atu hetan pás no estabilidade iha Kontinente ne’e.

Mundu hasoru dezafiu sira-ne’ebé foun kona-ba mudansa klimátika, terrorizmu no forma sira seluk kona-ba kriminalidade internasionál ne’ebé boot.

Rai-rai sira-nia dezenvolvimentu presiza investimentu no iha abiente ekónomiku no sosiál ne’ebé estável no previzivel. Relasaun kooperasaun viziñansa di’ak no estabilidade sai tiha ona nu’udar xave ida hosi xave sira seluk ba dezenvolvimentu no ba susesu sira-ne’ebé alkansa hosi rai sira Kontinente ida-ne’e nian, iha dékada tolu ikus ne’e. Atu hatan ho susesu ba dezafiu global sira-ne’e ita tenke prezerva no hametin kooperasaun entre nasaun sira, diálogu, negosiasaun no respeitu ba Direitu Internasionál.

Ha’u sei kontinua atu serbisu hodi haklean ba ita-nia relasaun, iha sentidu atu kontribui ba objetivu sira-ne’e no hametin relasaun ba amizade boot no kooperasaun entre Timor-Leste no Austrália.

Ha’u hakotu hodi formula votu susesu ba Vossa Eselénsia no ba prosperidade no moris-di’ak povu Austrália nian.

Ha’u hato’o brinde ida:

Ba ita-nia rain sira-nia prosperidade no ba aprofundamentu amizade nian entre Timoroan no Australianu sira.

Advertisements