Maxi Tahu

La’o Hamutuk, Institutu Timor-Leste ba Monitor no Analiza Dezenvolvimentu

www.laohamutuk.org

oct-30-4
Photo Credit: Seed Of Life

Estudu-sira kona-ba feto iha Timor-Leste rekoñese feto sira nia papél importante iha produsaun agrikultura, maibé mós relata dezafiu barak ne’ebé limita sira nia produtividade. Dezafiu sira ne’e inklui asesu ba oportunidade no rekursu agríkola, direitu ba rai, no feto nia responsabilidade dupla iha família nia laran. Enkuantu dezafiu sira hanesan asesu ba meius produsaun no direitu ba rai bele hadi’ak liu husi polítika, lei, ka mekanizmu formal sira seluk, dezafiu responsabilidade dupla iha família nia laran susar atu rezolve ho mekanizmu formal sira. Realidade ida nee, fó impaktu boot ba Timor-Leste nia produsaun agríkola tanba feto Timor-Leste halo papél signifikante iha prosesu produsaun agríkola nian.

Artigu ne’e diskute konsekuénsia husi responsabilidade dupla ba feto agrikultór sira nia produtividade, oinsá programa dezenvolvimentu governu nian koresponde realidade ne’e no fó hanoin balu kona ba oinsá polítika dezenvolvimentu nian bele maximiza feto sira nia produtividade iha setór agrikultura.

Konsekuénsia responsabilidade dupla ba produsaun agríkola

Feto sira involve no halo papél signifikante kuaze iha prosesu produsaun agríkola hotu, maibé sira nia envolvimentu la másimu tanba sira mós responsabiliza ba servisu uma laran nian. Iha Timor-Leste, feto konstitui 45% husi agrikultór subsistente. Feto sira involve hahú husi preparasaun fini too ba iha prosesu post-kolleita nian. Ida nee bele nota iha feto nia papel iha produsaun produtu importante boot rua iha Timor-Leste, hare no batar. Iha produsaun kafé mos, feto sira involve iha hamoos kafé-du’ut, kolleita no prosesu sira hafoin-kolleita nian. Iha area hortikultura nian feto sira involve maka’as iha prodús no fa’an produtu sira ba merkadu (MDF, 2014). Iha uma kain laran, agrikultór feto sira kaer responsabilidade ba servisu uma laran hanesan prepara matabixu, dasa uma laran, prepara oan ba eskola, te’in, fase roupa, nsst (JICA, 2010; FAO 2011; Hiroko, 2013; MDF, 2014). Responsabilidade dupla ne’e sai dezafiu ba feto agrikultór sira atu envolve másimu iha prosesu produsaun ne’ebé temin ona.

Responsabilidade dupla no produsaun agríkola família ida nian iha korelasaun maka’as maibe la fasil atu sukat tanba involve variável barak. Produtividade laos depende ba ema nia intervensaun deit maibé depende mós ba fatór external sira hanesan  sistema, klima, jestaun, nsst. Maski nune’e bele halo hipóteze katak, feto agrikultór sira fó impaktu signifikante ba produsaun agríkola, bazeia ba papél ne’ebé feto sira halo iha prosesu produsaun nian.  Foti ezemplu husi produsaun batar, iha produsaun batar feto sira kaer papél prinsipál iha hamos batar-du’ut. Tuir siénsia, batar-du’ut kompete ho batar ba nutrisaun iha rai, bee no loromatan-nia-roman ne’ebé sira presiza ba kreximentu. Durante etapa balu iha kreximentu batar nian, prezensa du’ut fuik sira sei redús maka’as kapasidade batar nian atu fó produsaun másimu. Peskiza ne’ebé iha hatudu ona katak tarde iha hamoos batar du’ut bele redús poténsia produsaun to 28% (Shumba et al. 1989). Bainhira feto agrikultór sira labele hamoos batar du’ut tuir nia tempu tanba tenki mós halo servisu uma laran nian, nia impaktu ikus mak produsaun la másimu. Poténsia impaktu responsabilidade dupla ba produsaun batar boot liu tan tanba iha produsaun batar, feto sira nia papél la’ós hamoos du’ut deit. Sira mós responsabiliza ba selesaun no preparasaun fini, kuda, no kolleita, hanesan haktuir iha tabela 1. Fatór sira ne’e iha influensia maka’as mós ba produsaun agrikultura (Fageria, 1992, p.3).

 

Tabela 1. Responsabilidade prinsipál feto no mane nian iha produsaun batar

(Fonte: Studies about Gender in Five Districts of Timor-Leste, 2011, sitasaun iha ADB, 2014)

Feto Mane
·         Selesaun no preparasaun fini

·         Kuda

·         Kolleita

·         Rai, prosesamentu no merkadorias

·         Fila rai

·         Irrigasaun

·         Kuidadu batar iha toos

Programa governu nian koresponde ba kontextu lokal feto Timor-Leste nian

Dokumentu ofisiál sira kona-ba dezenvolvimentu Timor-Leste nian repete bebeik estadu nia komitmentu ba integrasaun jéneru nian iha governu nian programa sira. Ministériu Agrikultura no Peska afirma momoos katak, “…deverá enforçar-se por integrar as questões do género no processo rotineiro de prestação serviços agrícolas: dezenvolvimento do projecto, implementação, monitorização e aprezentação de informação” (MAP, 2012, p.35). Planu Estratejiku Dezenvolvimentu Nasional 2011-2030 rekere integrasaun de jéneru iha polítika, programa, prosesu no orsamentu sira nudár dalan ida ba haforsa igualdade jéneru (Gov. TL., 2011-2030, p. 48). Infelizmente, planu governu nian barak mak la refleta kontextu sosiál no kulturál agrikultór feto Timor-Leste nian ohin loron, no too ikus mai la fó benefísiu másimu ba feto sira. Investimentu barak foo benefísiu liu ba mane sira duke feto, no iha kazu balu, hatodan liu tan agrikultór feto sira.

Investimentu boot ida iha setór agrikultura mak fahe tratór ba grupu agrikultór sira. Too oras ne’e, governu fahe ona tratór kiik no boot besik rihun-haat ba agrikultór sira. Maibé investimentu ne’e foo benefísiu boot liu ba mane sira, ein termu de hakmaan agrikultór sira nia servisu. Agrikultór mane sira mak kaer responsabilidade boot iha taa rai/toos no halai natar. Tratór ne’ebé fahe, hakmaan sira nia servisu ne’e. Agrikultór feto sira hetan todan liu tan, tanba ho tratór, mane sira bele halo toos luan liu tan, nune’e  feto sira  tenki kuda iha area luan liu no  hamos du’ut fuik barak liu tan. Investimentu boot seluk maka iha irrigasaun boboot sira ne’ebé orienta liu ba fornesimentu bee ba natar sira. Família agrikultór barak, liu-liu feto agrikultór sira ne’ebé maioria kuda modo no hakiak  animal iha toos uma hun, ladún hetan benefísiu direta husi investimentu  nee. Tanba laiha irrigasaun adekuadu ba hortikultura, produsaun hortikultura mós labele másimu, tanba feto sira ne’ebé kuda modo, loroloron gasta enerjia barak hodi kuru bee atu rega sira nia modo. Dalaruma sira labele ba kuru bee no rega modo tuir nia tempu, tanba tenki tau matan ba servisu uma laran nian.

Iha programa agrikultura balun mak fó duni benefísiu ba feto agrikultór sira. Hanesan ezemplu mak programa hortikultura iha Aileu no Maubisse. Iha programa ne’e feto lubuk mak involve no hetan benefísiu tanba hakmaan feto sira servisu liu husi aplikasaun teknolojia ne’ebé apropriadu no sistema merkadu ne’ebé organizadu di’ak liu. Aplikasaun sistema tunnel no rega modo iha programa ne’e redús feto sira nia kolen atu kuru bee. Sistema tunnel redús nivel evaporasaun no hamenus nesesidade atu rega bebeik. Introdusaun sistema drip watering – liga pontu rega nian ba aihoris ida-idak, redús kolen tanba la’o ba kuru bee no rega manual. Sistema konesaun ba merkadu ne’ebé projetu sira ne’e estabelese signifikativamente redús feto sira nia enerjia no tempu ne’ebé sira gasta atu ba merkadu no fa’an sasán. Sistema sira hanesan ne’e fasilita feto sira ne’ebé kole liu ona tanba servisu uma laran nian atu nafatin bele halo produsaun ho di’ak.

Hanoin balun ba oin

Estudu iha fatin barak hatudu ona katak bainhira feto sira nia produtividade sa’e, sei hasa’e produsaun, aumenta uma kain nia rendimentu no hadi’ak ekonomia família nian. Organizasaun Mundial ba Ai-han no Agrikultura (FAO) nia relatóriu State of Food and Agriculture tinan 2011 nian konklui  katak hasa’e feto sira nia asesu ba rekursu no oportunidade agrikultura nian sei kontribui ba hasa’e produsaun ai-han iha mundu tomak 20-30%, hamenus hamlaha, hasa’e rendimentu no hadi’ak ekonomia iha area rural (FAO, 2010-2011). Iha Timor-Leste, kreximentu 20-30% iha produsaun ai-han sei iha impaktu boot tebes ba ekonomia. Maibé, dezafiu ba Timor-Leste mak oinsá maximiza feto sira nia asesu ba rekursu no oportunidade sira ne’e, bainhira iha tempu hanesan sira tenki gasta tempu barak hodi tau matan ba servisu uma laran nian.

Divizaun responsabilidade iha família ida nia laran la’ós buat foun ida ne’ebé foin mosu sein razaun ida. Rekoñesimentu ne’e laos atu simu katak feto sira tenki kontinua bebeik ho tradisaun ne’e, maibé atu rekoñese katak, programa governu nian sira no projetu agrikultura sira, presiza adapta–an ba kontextu atuál. Dezeñu ba programa agrikultura sira, no programa ba dezenvolvimentu rural nian ein jerál, presiza konsidera oinsá programa sira ne’e bele hakmaan feto agrikultór sira, ne’ebé hetan ona responsabilidade todan servisu uma laran nian.

Hanesan ezemplu, bainhira estabelese sistema irrigasaun presiza konsidera katak sistema irrigasaun ida ne’ebé fó liu benefísiu direta ba feto sira mak sistema ne’ebé bele kanaliza ba sira nia toos sira no uza ba rega sira nia modo. Tratór kiik sira ne’ebé feto sira bele uza hodi prepara rai iha toos ne’ebé kiik di’ak liu duke tratór boot sira ne’ebé nia kustu no impaktu ba rai boot liu. Implementasaun sistema modernu no apropriadu ba kontrola du’ut fuik sira sei fó liu vantajen ba feto sira duke introdusaun mákina boboot sira seluk. Programa estensaun ne’ebé maioria extensionista sira mane, la fó vantajen boot ba feto agrikultór sira tanba feto sira sei sente livre liu atu konsulta ho extensionista feto sira.

Referénsia

Asian Development Bank (ADB). (2014). Timor-Leste Country Gender Assessment. p.77.

Direção Geral da Estatística de Timor-Leste.  (2013). Timor-Leste Labour Force Survey 2013

National Statistic Directorate of Timor-Leste.  (2011). Timor-Leste Household Income and Expenditure Survey 2011

Fageria, N.K. (1992). Maximizing Crops Yield. New York, US: Marcel Dekker, Inc.

Food and Agriculture Organization (FAO). (2011). The State of Food and Agriculture 2010-2011: Women in Agriculture, closing the gender gap for development.

Inoue, H. (2013). Post-1999 State Building in East Timor: Local Reception of State Institutions and Cultures of Governance. PhD Thesis.

Japan International Cooperation Agency (JICA). (2011). Country Gender Profile: Timor-  Leste. JICA

Market Development Facility (MDF) 2014. Analysis of Poverty and Gender in Agriculture in Timor-Leste. Cardno

Ministeriu de Agricultura e Pescas (MAP). (2012). Plano Estratégico 2014 -2020

Shumba, E.M., S.R. Waddington and M. Rukuni. 1989. Delayed maize planting in a smallholder farming area of Zimbabwe: Problem diagnosis. Zimbabwe Journal of Agricultural Research 17: 103-122.

The Government of Timor-Leste (Govt. TL).  (2011). Timor-Leste Strategic Development Plan 2011-2030.

Advertisements