Prezidénsia Repúblika sei fó prémiu neen ba maluk timoroan sira-ne’ebé iha vizaun, hanoin inovativu, karákter úniku tebes no kapasidade ne’ebé aas hodi halo peskiza iha Timor-Leste.
‘‘Prémiu Pekiza Prezidénsia’ hanesan inisiativa ida husi Prezidénsia Repúblika ne’ebé buka haburas no hasa’e atividade peskiza hodi fasilita produsaun no fahe koñesimentu. Peskiza nia objetivu prinsipál mak kria plataforma ida ba peskizadór sira hodi hala’o peskiza kona-ba polítikas ho objetivu atu enkoraja ukun-na’in sira atu halo polítikas bazeia ba evidénsia sira.
Espesifikasaun
Peskizadór sira bele halo peskiza kona-ba tópiku sira tuirmai ne’e:
- Impaktu mudansa klimatika ba Timor-Leste
- Produtu inovativu (hahan local)
- Kultura no identidade
- Potensia energia renovavel iha Timor-Leste
- Lei Tradisional and resolusaun konflitu
- Responsabilidade Sívika
Peskija ida-idak sei hetan fundus USD 3.000
Informasaun ba hakerek-na’in sira
Obra tenke orijinál no la bele publikadu ona. Keta hatama materiál ne’ebé konsideradu ona ba publikasaun ida seluk.
- Obra labele liu liafuan 7.000-8.000, la inklui gráfiku, nota pájina okos (footnote), aneksus ka referénsias.
- Títulu labele liu liafuan 15.
- Proposta labele liu liafuan 1.000. Di’ak liu indika liafuan xave ka fraze xave 3-8. Lia maklokek bele hakerek ho lia-tetun, portugés ka inglés.
- Obra tenke hakerek ho MS Word, Spasu 1.5 no haruka ba e-mail ne’ebé indika iha kraik.
- Sei husu ba hakerek-na’in (sira) nebe’é liu iha seleksaun dokumentus atu asina Termu Transferénsia Direitus Autór nian ( sei asina iha Kontratu).
- Lian: lia-tetun, portugés, inglés, bahasa indonesia
- Prazu hatama aplikasaun: Loron ikus hatama aplikasaun dia 19 de Maio 2016.
- Prazu ba draft dahuluk: loron 90 hahú husi data ne’ebé akordadu ona hodi hahú serbisu. Bele hanaruk tan prazu ba loron 30 wainhira aprezenta justifikasaun.
- Prazu ba draft daruak: loron 30 hahú husi loron ne’ebé akordadu ona hodi hahú serbisu
- Prazu ba versaun finál: loron 30 hafoin avaliasaun entrega tiha ba Peskizadór.
Peskizadór nia kompeténsias, aptidaun no esperiénsia:
Peskizadór tenke iha hanoin ne’ebé inovativu no halo didi’ak peskiza kona-ba tópiku ne’ebé hili tiha
- Peskizadór tenke hatudu kapasidade analítika no investigativu
- Kandidatu tenke sidadaun Timor-Leste
- Kandidatu bele hatama aplikasaun nu’udar ema/indivíduu ka grupu.
Hodi hatama manifestasaun interese (MI)
Bele haruka Ita-Boot sira-nia aplikasaun no dokumentus sira seluk liu husi e-mail filomeno.soares@presidenciarepublica.tl/matias.saldanha@presidenciarepublica.tl ho telemovel (670)78001009 ho asuntu “Aprezentasaun MI” to’o loron 19 de Maio 2016
Dokumentu hirak ne’ebé akompaña aplikasaun mak sira hanesan tuirmai ne’e:
- Formuláriu manifestasaun interese (prenxe tiha ona)
- CV kompletu (inklui informasaun akadémika no lista livru/artigo publikadu ona)
- Exertu husi artigu ida-ne’ebé foin hakerek (publika tiha ona ka lae)
- Naran no kontaktu husi referénsia na’in-rua
Aplikantes sira ne’ebé liu iha seleksaun dokumentus mak sei hetan kontaktu.